Мөрдөн байцаах албаны 2022 оны үйл ажиллагааны тайлангийн хурал, тэргүүний болон ажил, мэргэжлийн аварга алба хаагч, шилдэг мөрдөгч нарт шагнал гардуулах ёслолын ажиллагаа  өнөөдөр /2022.12.27/ зохион байгуулагдлаа.

Энэхүү тайлангийн хуралд Цагдаагийн ерөнхий газрын тэргүүн дэд дарга, бригадын генерал Ц.Ням-Очир, Мөрдөн байцаах албаны дарга, цагдаагийн хурандаа Б.Батсуурь болон албаны зөвлөлийн гишүүд,  төв, орон нутгийн цагдаагийн газар, хэлтсийн мөрдөн шалгах нэгжийн 548 алба хаагч 21 байршлаас танхимаар болон цахимаар хамрагдлаа.

Тус арга хэмжээний үеэр Мөрдөн байцаах албанаас 2022 онд хийж хэрэгжүүлсэн онцлог ажлуудыг танилцуулж, тэргүүний болон шилдэг алба хаагчдадаа шагнал гардуулж, ирэх 2023 онд хэрэгжүүлэх ажил, арга хэмжээний зорилтоо тодорхойллоо.

Хурлын үеэр ажил хөдөлмөрөөрөө бусдыгаа тэргүүлэн ажилласан харьяа газар, нэгжийн хамт олон, алба хаагчдыг шагнаж урамшууллаа.

 “Тэргүүний хамт олон”-оор Сонгинохайрхан дүүргийн цагдаагийн газрын нэгдүгээр хэлтсийн Мөрдөн байцаах тасаг;

“Ажил мэргэжлийн” аварга алба хаагчаар

Дорнод аймгийн цагдаагийн газрын Мөрдөн байцаах тасгийн дарга, цагдаагийн дэд хурандаа Н.Ууганбаяр;

Мөрдөн байцаах албаны Дүн шинжилгээ, үнэлгээ, хяналт шалгалтын хэлтсийн хяналт шалгалт хариуцсан ахлах мөрдөгч, цагдаагийн дэд хурандаа Б.Ганбаатар;

Тээврийн цагдаагийн албаны Мөрдөн шалгах газрын Мөрдөн шалгах хэлтсийн ахлах мөрдөгч, цагдаагийн хошууч Б.Ариунболд;

Сонгинохайрхан дүүргийн цагдаагийн газрын нэгдүгээр хэлтсийн Мөрдөн байцаах тасгийн ахлах мөрдөгч, цагдаагийн ахлах дэслэгч Ц.Орхонсэлэнгэ;

Хан-Уул дүүргийн цагдаагийн газрын нэгдүгээр хэлтсийн Мөрдөн байцаах тасгийн мөрдөгч, цагдаагийн ахлах дэслэгч Т.Амарсанаа;

Архангай аймгийн цагдаагийн газрын Мөрдөн байцаах тасгийн мөрдөгч, цагдаагийн ахмад Б.Энхболд нар тус тус шалгарч, ажил мэргэжлээрээ бусдыгаа хошуучлан ажилласан төв, орон нутгийн  шилдэг 10 мөрдөгчийг шагнаж урамшууллаа.

Улиран одож буй 2022 онд эрхэлсэн ажилдаа идэвх, зүтгэл гарган бусад нэгжүүдээ  манлайлан ажилласан “Тэргүүний хамт олон”, “Ажил мэргэжлийн аварга”, “Шилдэг мөрдөгч”-өөр шалгарсан алба хаагчид та бүхэндээ ажлын амжилт хүсье.

Монголын цагдаагийн эгнээ болор мэт тунгалаг, болд мэт бат байх болтугай.