ЧИМЭДИЙН НЭРГҮЙ

/1953-2022 он/

Монголын цагдаа, дотоодын цэргийн байгууллагын ахмад ажилтан, цагдаагийн хурандаа Ч.Нэргүй нь 2022 оны 04 дүгээр сарын 22-ны өдөр өвчний улмаас таалал төгсөж, бид бүхэнд нөхөж баршгүй гарз тохиолоо.

Тэрээр 1953 онд Улаанбаатар хотод төрж, 1971 онд ерөнхий боловсролын сургууль, 1975 онд Монгол Улсын их сургууль, 1985 онд Намын дээд сургуулийг хуульч, улс төр судлаач мэргэжлээр тус тус төгссөн.

1975-1977 онд Төв аймгийн Шүүхийн хуулийн зөвлөх, Улсын өмгөөлөх коллежийн өмгөөлөгч,

1977-1980 онд Нийгмийг аюулаас хамгаалах яамны харьяа Улсын цагдан сэргийлэх ерөнхий газрын паспортын хэлтсийн байцаагч, ахлах байцаагч,

1981-1983 онд Улаанбаатар хотын цагдан сэргийлэх газрын Паспортын тасгийн дарга,

1985-1988 онд Сүхбаатар дүүргийн Ардын Депутатуудын Хурлын Гүйцэтгэх захиргааны хариуцлагатай нарийн бичгийн дарга, Батлан хамгаалахад туслах нийгэмлэгийн Төв зөвлөлийн зааварлагч,

1988-1989 онд Нийгмийг аюулаас хамгаалах яамны Хэнтий аймаг дахь хэлтсийн цагдан сэргийлэх ангийн паспортын ахлах байцаагч,

1989-1996 онд Улсын цагдан сэргийлэх ерөнхий газрын Паспортын хэлтсийн ахлах байцаагч, Улаанбаатар хотын Цагдан сэргийлэх газрын Паспортын тусгай тасгийн дарга, Паспорт бүртгэлийн хэлтсийн дарга, Улаанбаатар хотын Цагдаагийн газрын Тамгын хэлтсийн аж ахуйн ахлах офицер, Цагдаагийн ерөнхий газрын “Цагаан шонхор” ТӨҮГ-ын захирлын үүрэг гүйцэтгэгч,

1996-1999 онд Иргэний бүртгэл, мэдээллийн улсын төвийн дарга,

1999-2002 онд Хүч спорт хорооны дарга,

2002-2006 онд Цагдаагийн ерөнхий газрын Хяналт шалгалтын тусгай тасаг, Хяналт шалгалтын хэлтсийн дарга, 2006-2007 онд Хэрэг бүртгэх газрын Захиргаа, удирдлагын хэлтсийн даргаар тус тус томилогдон ажиллаж байгаад 2007 онд цэргийн байнгын тэтгэвэрт гарчээ.

Түүний Монгол Улсын цагдаагийн байгууллага болон  төрийн албаны хөгжил дэвшилд оруулсан хувь нэмэр, хөдөлмөр, зүтгэлийг төр засгаас өндрөөр үнэлж, Цэргийн гавьяаны улаан тугийн одон, Цэргийн гавьяаны одон, Цэргийн хүндэт медаль, Ардын хувьсгалын 60, 70, 80 жил, Зэвсэгт хүчний 60 жилийн ойн медаль, Цагдаагийн алдар, Цагдаагийн гавьяа, тэмдэг болон бусад байгууллагын шагналаар шагнажээ.

Талийгаачийн шударга, зарчимч, хүнлэг энэрэнгүй, шаргуу хөдөлмөрч, хичээнгүй, эрхэм нандин зан чанар, мэргэжлийн арвин их туршлага нь цагдаа, дотоодын цэргийн анги, байгууллагын удирдлагууд, алба хаагч бидний сэтгэл зүрхэнд үеийн үед мөнхрөн үлдэх болно.

Та минь Монгол эх орныхоо ариун хөрс, шороонд тайван амгалан нойрс доо.

Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.

УМ САЙН АМГАЛАН БАЙХ БОЛТУГАЙ.

ЦАГДААГИЙН ЕРӨНХИЙ ГАЗАР