Энэ долоо хоногт цагдаа, дотоодын цэргийн байгууллагаас зохион байгуулсан иргэд, олон нийт рүү чиглэсэн ОНЦЛОХ үйл явдлыг тоймлон хүргэж байна.

ТӨРИЙН ЦЭРГИЙН БАЙГУУЛЛАГУУДЫН ХАМТ ОЛОНД "МЭНДЧИЛГЭЭ" ДЭВШҮҮЛЛЭЭ

Монгол цэргийн өдрийг тохиолдуулан цагдаагийн ерөнхий газрын дарга, дотоодын цэргийн командлагч, хошууч генерал Ж.Болд төрийн цэргийн байгууллагуудын хамт олонд мэндчилгээ дэвшүүлж хэлсэн үгэндээ:

Монгол Улсын төрийн цэргийн байгууллагын эрхэм генерал, офицер, ахлагч, түрүүч, байлдагч та бүхэндээ Монгол Улсад орчин цагийн Зэвсэгт хүчин үүсэж хөгжсөний 101 жилийн ой, “Монгол цэргийн өдөр”-ийг тохиолдуулан цагдаа, дотоодын цэргийн байгууллагын бие бүрэлдэхүүний нэрийн өмнөөс болон хувиасаа чин сэтгэлийн мэндчилгээ дэвшүүлье.

Монгол цэргийн яруу алдар үеийн үед мандан бадарч, төрийн хар сүлд ивээж, түүхэн цаг хугацааны эргэлтэд зорьсон үйлс, зүтгэсэн зүтгэл тань үргэлжид мандан бадрах болтугай хэмээв.

 “МОНГОЛ ЦЭРГИЙН ӨДӨР”-ИЙГ ТОХИОЛДУУЛАН МОНГОЛ УЛСЫН ЕРӨНХИЙЛӨГЧ, ЗЭВСЭГТ ХҮЧНИЙ ЕРӨНХИЙ КОМАНДЛАГЧ У.ХҮРЭЛСҮХ ТӨРИЙН ДЭЭД ШАГНАЛ, ОДОН, МЕДАЛЬ ГАРДУУЛЛАА

“Монгол цэргийн өдөр”, орчин цагийн Зэвсэгт хүчин үүсэж хөгжсөний 101 жилийн ойг тохиолдуулан Монгол Улсын Ерөнхийлөгч, Зэвсэгт хүчний ерөнхий командлагч У.Хүрэлсүх эрхэлсэн ажилдаа үр бүтээлтэй ажиллаж онцгой амжилт гарган, эх орныхоо хөгжил дэвшилд үнэтэй хувь нэмэр оруулж буй алба хаагчдад төрийн дээд шагнал, одон, медаль гардууллаа.

Мөн энэ өдрийг тохиолдуулан Цагдаагийн ерөнхий газрын дарга, дотоодын цэргийн командлагч, хошууч генерал Ж.Болд улсын онц чухал объектыг хамгаалах, нийтийн хэв журам сахиулах, олон нийтийн аюулгүй байдлыг хангах ажилд идэвх зүтгэл гарган ажиллаж байгаа алба хаагчдад цол, шагнал гардууллаа.

УЛААНБААТАР ДОТООДЫН ЦЭРГИЙН ХҮРЭЭНИЙ АНГИ, БАЙГУУЛЛАГЫН ХЭМЖЭЭНД “НЭГДСЭН ТООЛЛОГО”-ЫГ ЗОХИОН БАЙГУУЛЛАА

Монгол Улсад орчин цагийн Дотоодын цэрэг үүсэж хөгжсөний 100 жилийн ойг тэмдэглэн өнгөрүүлэх ажил, арга хэмжээний хүрээнд алба хаагчдын цэрэг-эх оронч хүмүүжлийг дээшлүүлэх зорилгоор анги, салбарын “Нэгдсэн тооллого”-ыг Үндэсний цэцэрлэгт хүрээлэнд байрлах “Цагдаа цогцолбор”-т зохион байгууллаа.

Энэхүү арга хэмжээнд Улаанбаатар Дотоодын цэргийн хүрээний анги, байгууллагын бие бүрэлдэхүүн оролцсон юм. Мөн энэ үед бие бүрэлдэхүүн “Цэргийн тангараг”-ийг давтаж, алба хаагчдын бэлтгэсэн жагсаалын болон урлагийн тоглолт болсон юм.

МӨРДЭСТЭЙ ЭМЭГТЭЙЧҮҮДИЙН ЧУУЛГАН ЗОХИОН БАЙГУУЛЛАА

Дундговь аймагт Цагдаагийн байгууллага үүсэн байгуулагдсаны 80 жилийн ой, Зэвсэгт хүчин үүсэж хөгжсөний 101 жилийн ойг тохиолдуулан Дундговь аймаг дахь Цагдаагийн газар, Шүүхийн шинжилгээний албатай хамтран мөрдэстэй эмэгтэйчүүдийн манлайлал, оролцоо, хамтын ажиллагааг сайжруулах зорилгоор үндэсний аюулгүй байдлыг хангах тусгайлсан чиг үүрэг бүхий байгууллагуудын цолтой эмэгтэй алба хаагчдын анхдугаар чуулганыг зохион байгууллаа. Чуулганд Зэвсэгт хүчний 278 дугаар байгууламж, Онцгой байдлын газар, Прокурорын газар, Тагнуулын хэлтэс, Шүүхийн шийдвэр гүйцэтгэх газрын эмэгтэй алба хаагчид, ахмадууд, Монголын эмэгтэйчүүдийн холбооны Дундговь аймаг дахь салбар зөвлөлийн төлөөлөл оролцож салбартаа түүчээлэн ажиллаж байгаа алба хаагчдыг шагнаж урамшууллаа.

“ЦАГДАА”, "ЦАГДАА ЖОЛООЧ", “ХАРУУЛЧИН” МЭРГЭЖИЛОЛГОХ СУРГАЛТАД СУРАЛЦАЖ,

ЦАГДАА, ДОТООДЫН ЦЭРГИЙН БАЙГУУЛЛАГАД АЖИЛЛАХЫГ УРЬЖ БАЙНА

 Цагдаа, дотоодын цэргийн байгууллагын ахлагч албан тушаалын сул орон тоог нөхөх, нөөц бүрдүүлэх зорилгоор цагдаа, цагдаа зохицуулагч, цагдаа-жолооч, Дотоодын цэрэгт жолооч, харуулчны ажлын байранд хугацаат цэргийн алба хаасан, бүрэн дунд болон түүнээс дээш боловсролтой иргэдийг шалгаруулан “Цагдаа”, “Цагдаа жолооч”, “Харуулчин” мэргэжил олгох сургалтад суралцуулах ажлыг зохион байгуулах гэж байна.

         Сул орон тоог энд дарж үзнэ үү.

Тавигдах ерөнхий шаардлага:

• Монгол Улсын иргэн байх,
• Монгол хэлний ярианы болон бичгийн чадвартай байх, /Монгол хэл бичгийн дүрэм, үг зүй, найруулга зүйн зохих мэдлэгтэй/,
• Гэмт хэрэг үйлдэж, ял шийтгүүлж байгаагүй,
• Сэтгэцийн өвчин, эмгэггүй байх,
• Бүрэн дунд болон түүнээс дээш боловсролын зэрэгтэй байх,
• Хуулийн дагуу цэргийн жинхэнэ алба хаах үүрэг хүлээсэн иргэн үүргээ биелүүлсэн байх /цэргийн албыг биеэр хаасан болон оюутан цэрэг, дүйцүүлэн хаасан/