Хэнтий аймгийн Дэлгэрхаан сумын Аварга тосон рашаан сувилалд гэр бүлээрээ амарч байсан 12 настай Д.Энхжин охин энэ сарын 2-нд нууранд эрсдэх дөхжээ. Тэр үед Замын цагдаагийн ахмад Г.Баяржаргал гэр бүлийн хамт амарч явахдаа эр зориг гарган нуураас охиныг аварсан байна. Энэ талаар охины эмээ: “Охин маань нуурын эрэг дээр жижиг хөвөгчөөр хөвж байгаад салхинд туугдан нуурын гол руу орчихсон. Бид дэмий сандралдахаас өөр зүйл хийж чадаагүй байхад Г.Баяржаргал авхаалж самбаа гарган нуурын гол руу сэлж охиныг аварсан. Энэ хүүд насан туршдаа талархаж явах болно” гэв. Замын цагдаагийн ахмад Г.Баяржаргалтай утсаар холбогдож энэ талаар тодруулахад, “Тухайн үед нилээд салхитай цуцсан байсан ч охиныг эрэг рүү хөвөгчтэй нь татаж гаргасан” гэлээ. Г.Баяржаргалын хувьд өмнө нь бас нэг хүний амийг гол усны аюулаас аварч байсан аж.

Эх сурвалж: "Зууны мэдээ" сонины 176 /4803/ дахь дугаар

Албан үүргээ нэр төртэйгөөр гүйцэтгэн, хүмүний алтан амийг аварч амьдрал тэтгэсэн цагдаагийн алба хаагчдаа баяр хүргэж, сайн сайхан бүхнийг хүсье.