Улсын төсвийн болон орон нутгийн хөрөнгө оруулалтаар Цагдаа, дотоодын цэргийн байгууллагуудын хэмжээнд баригдаж буй барилга байгууламж, засварын ажлын явц байдалтай Цагдаагийн ерөнхий газрын Санхүү, аж ахуйн албаны дарга, цагдаагийн хурандаа П.Батбаатар болон бусад албан хаагчид өнөөдөр /2020.08.07/ очиж танилцлаа.

Тэрээр Монгол Улсын барилгын тухай хууль, Барилгын норм ба дүрмийг баримтлан, Хөдөлмөр хамгаалал аюулгүй ажилллагааг сайтар сахиж, гүйцэтгэлийн гэрээнд заасан хугацаанд чанартай, хурдан шуурхай гүйцэтгэх чиглэл өгч, ажлын амжилт хүслээ.

Дотоодын цэргийн 805 дугаар ангийн хугацаат цэргийн алба хаагчдын “Цэргийн байр”-ны барилгыг энэ оны 09 дүгээр сарын 01-ний өдрийн дотор Улсын комисс ажиллуулан ашиглалтад хүлээлгэн өгөх, “Хүч” спорт хорооны биеийн тамирын заалны шалны засварын ажлыг энэ сарын 15-ны өдөрт багтаан дуусгах, энэ оны хөрөнгө оруулалтын төлөвлөгөөнд тусгагдсан “Сүлд” чуулгад байрлах Цагдаагийн музейн засварын худалдан авах ажиллагааг яаралтай зохион байгуулж гүйцэтгэгчийг сонгон шалгаруулан засварын ажлын гэрээ байгуулах, Нийслэлийн хөрөнгө оруулалтаар хэрэгжиж буй Налайх дүүрэг дэх цагдаагийн хэлтсийн барилгын ажлын явцад байнгын хяналт тавьж, танилцуулж ажиллахыг Хангалт үйлчилгээний төвийн Барилга байгууламжийн хяналтын тасагт үүрэг болголоо. 

Налайх дүүрэг дэх цагдаагийн хэлтэс, Дотоодын цэргийн 805 дугаар ангийн хугацаат цэргийн алба хаагчдын “Цэргийн байр” баригдсанаар Цагдаа, дотоодын цэргийн  алба хаагчдын ажиллах орчин сайжирч, албаны бэлэн байдал дээшилж, иргэдэд хүргэх үйлчилгээ түргэн шуурхай болох юм.

Цагдаагийн ерөнхий газрын “Хүч” спорт хорооны заалны модон шал шаардлага хангахгүй болсоныг шинэчлэн засварлаж байгаа бөгөөд тус засварыг хийснээр цагдаагийн алба хаагчид стандартын шаардлагад нийцсэн спорт танхимд чөлөөт цагаа зөв боловсон өнгөрүүлэх, бие бялдараа хөгжүүлэх нөхцөл боломж бүрдэж байна.