Эх сурвалж: www.zaluucom.mn

Эх дэлхийн амар амгалан, байгаль дэлхийн баялаг эрдэс, уух ус, ургамал бүхэн, цэнгэг агаар бүр бидний үнэт эрдэнэ юм. Хүн бүр эрүүл орчинд, амьд явах эрхтэй. Эрхийнхээ дагуу үүргээ биелүүлэх нь ч бас нэн чухал.

Байгаль эх дэлхий минь ямар сайхан зүй тогтолтой юм бэ? Ургаа мод, уул ус, шувуудын чимээ тансаг бүхний эхлэл эх дэлхийд байх нь юутай сайхан.

Та эх орноо, эх дэлхийгээ хайрлан хамгаалдаг уу? өөрөөсөө нэг асуугаад үзээрэй.

Найз нөхөдтэйгээ аялал зугаалгандаа явахдаа, гэр бүлийнхэнтэйгээ амралтаа өнгөрүүлчихээд хог болон бусад зүйлсээ байгаль дэлхийдээ орхиод явдаг юм биш биз, хээр гарч хэрэггүй зүйлсээ шатаанаа гээд машиндаа ачиж аваад явдаг юм биш биз,  барилгын хогноос илүү гарсаныг нь энд хаячихъя гээд хаядаг юм биш биз, сүсэг бишрэлдээ итгэн энд тэнд хадаг зүүгээд явдаг юм биш биз!

Хэлдэггүй, ярьдаггүй ч эх дэлхий минь гомддог л байхдаа...

Таалагдахгүй зүйлсээ хэлж ярьж, эсэргүүцэл үзүүлж гомдолдог нь та, бид. Эх дэлхий минь намайг битгийн хорлооч, намайг битгий сүйтгээч гэж хэлж чадахгүй ч гомдож л байгаа байх даа.

Газар усаа сэндийчүүлэх, зулзаган модоо тайруулах, ан амьтнаа устгуулах, санамсар болгоомжгүй байдлаас болж гал түймэр гарах, хэдэн төгрөгний төлөө хөрст дэлхийгээ сэндийчүүлэхийг харах юутай уйтай байдаг бол.

Байгаль дэлхий маань өдрөөс өдөрт өнгөө алдаж буй тухай, цөлжилт, хуурайшилт эрчимтэй явагдаж буй тухай, байгалийн тэнцвэр алдагдаж буй тухай өдөр бүр эрдэмтэн, судлаачид ярих боллоо. Ямар уйтай.

Бяцхан үрс, үр хойчдоо тансаг байгаль дэлхийгээ үлдээж чадахгүй болж байгаа юм биш биздээ. Өнөөдөр, маргаашаа харсан зөвхөн өөрийгөө бодсон тийм асар хэрнээ өрөвдмөөр сэтгэлгээ та нараас минь гарахгүй биздээ.

Эх дэлхийгээ хайрлан хамгаалах нь иргэн бүрийн үүрэг гэлцдэг. Гэхдээ яг яаж хамгаалах ёстой юм бэ?

Хөрст дэлхийгээ сэндийчлэхгүй байж, хогоо хаяхгүй байж, орчноо бохирдуулахгүй байж, үр хүүхэддээ зөв үлгэр дуурайлал үзүүлэхээс эхтэй юм болов уу? Та өөрөөсөө нэг асуугаач, эх дэлхийгээ нэг анзаараач!

“Ачит аав, элбэрэлт ээжээс тань өөрцгүй эх дэлхий, байгаль орчин эн тэргүүнд байх ёстой”