Сүхбаатар дүүргийн цагдаагийн II хэлтсээс Монгол Улсын Засгийн газрын 2011 оны 58 дугаар тогтоолоор батлагдсан “Олон нийт-цагдаагийн хамтын ажиллагаа” үндэсний хөтөлбөр, Цагдаагийн ерөнхий газрын даргын 125 тоот тушаалын хэрэгжилтийг хангах, гэмт хэрэгтэй тэмцэх, нийгмийн хэв журам хамгаалах, гэмт хэргээс урьдчилан сэргийлэх ажлыг эрчимжүүлэх, цагдаагийн байгууллагын үйл ажиллагааг иргэд, олон нийтэд сурталчлах, гэмт хэргээс урьдчилан сэргийлэх ажилд төрийн болон төрийн бус байгууллага, иргэд олон нийтийн үүрэг оролцоог нэмэгдүүлэх зорилгоор “Нээлттэй хаалганы өдөр” өдөрлөгийн арга хэмжээг 2014 оны 06 дугаар сарын 18-ны өдөр 11-13 цагийн хооронд СБД-ийн 14-р хороо, 7-н буудлын эцсийн талбайд зохион байгуулан ажиллалаа.
Өдөрлөгийн арга хэмжээг Дүүргийн засаг даргын орлогч Д.Боргио, Л.Нармандах, Л.Амарзаяа нар нээж, үлгэр жишээ үлээвэр найрал хөгжмийн аянд төрийн дуулал эгшиглүүлж, тус цагдаагийн хэлтсийн алба хаагч нар ёслолын жагсаалаар алхаж иргэдэд хүндэтгэл үзүүлсэн байна.
Мөн тус хэлтсийн “Мөнгөн сүлд” хамтлаг ая дууны мэндчилгээ дэвшүүлж, Хэв журам хамгаалах тасгийн алба хаагч нар зэвсэггүй тулалдах мэх, гардан тулалдааны үзүүлбэр үзүүлж, “Эрэлч нохойн алба”-наас сургуулилттай нохойн үзүүлбэр үзүүлжээ.
Өдөрлөгийн арга хэмжээнд Дүүргийн гэмт хэргээс урьдчилан сэргийлэх ажлын зохицуулах зөвлөл, Дүүргийн засаг даргын тамгын газар, харъяа байгууллага, хэлтэсүүд оролцож, өөр өөрсдийн чиглэлээр иргэдэд зөвлөгөө өгч, сурталчилгааны материал тараасан байна.