Хууль сахиулах Их сургуулийн Цагдаагийн сургуулийг “Цагдаагийн ажил-эрх зүй” мэргэжлээр  төгссөн төгсөгчдийг  албан тушаалд томилж, цагдаагийн тангараг өргүүлэх ёслол Үндэсний цэцэрлэгт хүрээлэн дэх “Цагдаагийн алдар” цогцолборт боллоо.

        Энэ үеэр цагдаагийн хүрээний болон Хууль сахиулахын  их сургууль төгсөгчдийн ёслолын жагсаал болж, Монгол улсын цагдаагийн байгууллагын туг залж, төгсөгчдийг төв орон нутгийн цагдаагийн газар хэлтэст томилох тухай ЦЕГ-ын даргын тушаалыг уншиж танилцуулсан юм. Ёслолын үйл ажиллагаанд ЦЕГ-ын тэргүүн дэд дарга, тэргүүн дэд комиссар С.Баатаржав, дэд дарга, дэд комиссар Ж.Ганбаатар, Олон нийтийн аюулгүй байдлыг хангах газрын дарга, туслах комиссар Ж.Амгалан, Улаанбаатар цагдаагийн хүрээний дарга, цагдаагийн хурандаа Ч.Болдбаатар болон ЦЕГ-ын даргын зөвлөлийн гишүүд, хүндэт зочид, ахмадууд, шинээр томилогдож байгаа алба хаагчдын эцэг эх, үр хүүхдүүд оролцсон юм.

Тангарагийн хуудсанд гарын үсэг зурж, баталгаажуулан  цагдаагийн байгууллагын туганд хүндэтгэл үзүүлсний дараа ЦЕГ-ын  тэргүүн дэд дарга, тэргүүн дэд комиссар С.Баатаржав офицерын албан тушаалд томилогдсон алба хаагчдад баяр хүргэж үг хэллээ.

Мөн  олон нийт цагдаа хамтын ажиллагааны төвийн уран бүтээлчид ая дууны мэндчилгээ дэвжүүлж, бие хамгаалах урлагийн үзүүлэх тоглолт, албаны нохойн үзүүлэх тоглолт болж, тангараг өргөсөн алба хаагчдыг хамруулсан өргөн хүрээтэй үйл ажиллагаа ёслол төгөлдөр боллоо. 

Энэ үеэр мөн өргөсөн тангарагтаа үнэнчээр зүтгэж, эрхэлсэн ажилдаа  идэвхи зүтгэл гарган ажиллаж байгаа зарим алба хаагчдыг шагнаж урамшуулсан юм.

Тангараг өргөн, томилолт өвөртлөн эх орныхоо дөрвөн зүг найман зовхист ард иргэдийнхээ амар амгалан амгалан амьдралын төлөө зүтгэхээр явж байгаа алба хаагч нартаа амжилт хүсье.