Улсын онцгой комиссын шийдвэрээр 2020 оны 02 дугаар сарын 23-ны өдөр улс, хот хоорондын авто замаар зорчих тээврийн хэрэгслийн хөдөлгөөнийг хязгаарласан байсныг 2020 оны 03 дугаар сарын 03-ны өглөөний 06.00 цагт нээсэн. Зорчих хөдөлгөөнийг нээсэнтэй холбогдуулан цагдаагийн байгууллагаас улс, хот хоорондын чанартай хатуу хучилттай авто зам дагуу нийт 260 байршилд 682 алба хаагч, 256 автомашинтай  хөдөлгөөний аюулгүй байдлыг хангах, хяналт тавих зорилгоор зохион байгуулалтын арга хэмжээ авч ажилласан.

Цагдаагийн хяналт шалгалтаар хурд хэтрүүлсэн 179, хүн тээвэр хэтрүүлсэн 102, хүүхдийг буруу тээвэрлэсэн 50 хүнд Зөрчлийн тухай хуулийн холбогдох заалтуудаар шийтгэл оногдуулж, зөрчлийг арилгуулах арга хэмжээг авч ажилласны үр дүнд орон нутгийн замд хүний амь нас хохирсон ноцтой зам тээврийн осол, хэрэг бүртгэгдээгүй.

Замын хөдөлгөөнийг нээсэнтэй холбоотойгоор нийслэлийн шалган нэвтрүүлэх товчоодоор 2020 оны 03 дугаар сарын 03-ны өглөөний 06:00 цагаас мөн сарын 04-ний өглөөний 08:00 цаг хүртэлх хугацаанд нийт 31.998 тээврийн хэрэгслээр 108.772 иргэн орсон болон гарсан хөдөлгөөн бүртгэгдсэн.

Эдгээрээс 20.302 тээврийн хэрэгсэлээр 74.308 зорчигч нийслэл хот руу орон нутгаас орж ирсэн бөгөөд Улаанбаатар хотоос 11.696 тээврийн хэрэгслээр 34.464 иргэн орон нутаг руу зорчив. 

Хязгаарлалт тогтоосон хугацаанд 11.809 зорчигч бүхий 5.428 тээврийн хэрэгсэл батлагдаагүй зам маршрутаар хязгаарлалтыг нэвтрэх оролдлого гаргасныг илрүүлж буцаах арга хэмжээ авсан. Мөн орон нутагт онцгой комиссоос олгосон албан бичгийг ашиглан хууль бусаар зорчигч тээвэрлэлт хийхээр завдсан зөрчлийг илрүүлж харьяа аймгийн онцгой комисст шилжүүлэн өгч ажиллалаа. 

2020 оны 02 дугаар сарын 23-ны өдрөөс 03 дугаар сарын 03-ны өдрүүдэд зам тээврийн осол, хэргийн улмаас 23 хүн гэмтэж,  нийслэлд-2, орон нутагт-7 хүний амь нас хохирсон.

Мөн согтууруулах ундааны зүйл хэрэглэсэн үедээ тээврийн хэрэгсэл жолоодож зам тээврийн осол гаргасан 7 зөрчил бүртгэгдсэн юм.