Өвөрхангай аймаг дахь Цагдаагийн газрын урьдчилан сэргийлэх ажил хариуцсан ахлах мэргэжилтэн, цагдаагийн ахмад Б.Туяацэцэгтэй ярилцлаа.

Эх сурвалж: Өдрийн сонин

-Өндөржүүлсэн бэлэн байдал зарласан энэ өдрүүдэд Өвөрхангай аймгийн Цагдаагийн газар ямар зохион байгуулалтад орж ажиллав. Ачаалал хэр байв?

-Баян-Өлгий, Баянхонгор, Говь-Алтай зэрэг баруун аймгуудыг чиглэсэн хөдөлгөөн Өвөрхангайгаар дайрч өнгөрдөг. Ийм ч учраас аймгийн онцгой комисс, цагдаагийн алба хаагчид өндөржүүлсэн бэлэн байдал зарласан энэ өдрүүдэд ачаалалай ажилласан.

-Сар шинийн өдрүүдэд нөхцөл байдал ямар байсан бэ.  Ямар хүндрэл тулгарч байв?

-Онцгой комисс, цагдаагийн газраас эргүүл  гарч ажилласан. Мөн зарим газруудад камерын хяналт тавьж олуулаа цуглаж, айл хэсч байгаа эсэхэд  хяналт тавьж ажиллаа. Золголт хийлгэхгүй байх шийдвэрийн хүрээнд урьдчилан сэргийлэх ажил арга хэмжээг Цагдаагийн газраас авч  “Дараа нь золгоё”  гэсэн видео шторк бэлтгэж цахимд түгээсэн. Энэ ажил ч үр дүнгээ өгсөн гэж үзэж байна.

Сар шинийн баярын өдрүүдэд олуулаа цугласан, айл хэссэн  тохиолдол цөөн гарсан. Тухай бүрт нь  алба хаагчид шаардлага тавихад иргэд эерэгээр хүлээж авч байсан нь сайшаалтай.   Ер нь  иргэд төр засгийн шийдвэрт хүндэтгэлтэй хандаж Сар шинийн өдрүүдэд ёс зүйтэй байж, гэр гэртээ шинэлсэн. Мөн шинийн 1-ний нар хардаг уламжлал, зан үйл байдаг. Үүнээс урьдчилан сэргийлж   эргүүл гаргаж ажилласан. Нэг ч иргэн эргүүлд гарсан алба хаагчдад чирэгдэл учруулаагүй.

-Хөдөлгөөн хязгаарласан үед замын нөхцөл байдал ямар байв. Ямар төрийн зөрчил дутагдал гарсан бэ

-Онцгой комиссын шийдвэрээр өндөржүүлсэн бэлэн байдлын зэрэгт шилжиж, хот хооронд, аймаг сум, сум баг хоорондын автозамын хөдөлгөөнийг хязгаарласан.  Гэтэл дээрх хугацаа дуусгавар болоогүй байхад зарим жолооч нар баталгаат бус замаар явахыг завдах, хяналт шалгалтаар ажиллаж байгаа алба хаагчдын тавьсан шаардлагыг эсэргүүцэх зэрэг зөрчил гарсан.

Мөн  нас барсан хүний гэрчилгээ ашиглаж хотруу орохыг завдсан тохиолдол гарсан. тухайн иргэнээс тайлбар авахад “Яаралтай хот орох ажилтай байсан” гэж байгаа юм.

Үүнээс гадна Онцгой комиссоос олгосон зөвшөөрлөөрөө далимдуулж, хот хооронд болон сумаас аймаг руу зорчих зар нийтлэх, худал мэдээллийг түгээх, бусдыг явахыг уриалах зэргээр цахим орчинд худал мэдээллийг түгээсэн иргэнд хуулийн хариуцлага хүлээлгэсэн. Тэрбээр хот хооронд хүн зөөвөрлөхыг завлсан.

-Хөдөлгөөн хязгаарласан үед хулгайн замаар зорчихыг завдсан жолооч нарт хяналт хэрхэн тавьж ажиллав. Ер нь энэ төрлийн хэдэн зөрчил бүртгэгдсэн бэ?

-Хөл хорио тогтоосон үед  зарим жолооч нар баталгаат бус замаар явахыг завдах зөрчил  хэд хэд гарсныг  хяналт шалгалтаар илрүүлсэн.
Төрөөс гаргасан шийдвэрийг хэрэгжүүлээгүй замын хөдөлгөөнд оролцож, эрх бүхий албан тушаалтны тавьсан шаардлагыг биелүүлээгүй 34 жолоочийг илрүүлж, аймгийн Онцгой байдлын газарт шилжүүлэн 18 жолоочид Гамшгаас хамгаалах тухай хуулийн 5.13.1-д зааснаар хариуцлага хүлээлгэсэн.

Зөрчил гаргасан жолооч нараас  тодруулахад постонд дээр очоод учир байдлаа хэлээд гарч болох байх, мөн  таньдаг хүнээрээ гаргуулна гэсэн өрөөсгөл бодлоор олон зуун км замыг туулж ирсэн  тохиолдол байгаа.
Баталгаат бус замаар зорчсон зөрчлийг камерын тусламжтайгаар хяналт тавьж илрүүлсэн.

-Маргааш (Өнөөдөр) зам нээнэ.  Баруун аймгуудаас нийслэлийг чиглэсэн хөдөлгөөн Өвөрхангай аймгаар дайрч өнгөрдөг. Аймгийн цагдаагийн газраас хэрхэн ажиллахаар төлөвлөж байна вэ?

- Улсын онцгой комиссын шийдвэрээр улс, хот хоорондын зорчигч тээвэр, суудлын галт тэрэг болон орон нутгийн хуваарьт нислэг, хувийн тээврийн хэрэгслийн зорчих хөдөлгөөнийг гуравдугаар сарын 03-ны өдрийн 06:00 цагт нээхээр болсон. 
Үүнтэй холбоотойгоор улсын хэмжээнд олон мянган тээврийн хэрэгсэл нэг зэрэг орон нутгийн зам дээр хөдөлгөөнд оролцох мэдээлэлтэй байна. Ялангуяа Улаанбаатар хотын чиглэлд 40.0 мянган иргэн, 14.0 мянган орчим тээврийн хэрэгсэл зорчих тоо гарсан.

Дээрх шийдвэртэй холбоотойгоор  замын хөдөлгөөний аюулгүй байдлын хууль, дүрмийн хэрэгжилт, зам тээврийн осол хэргээс   урьдчилан сэргийлэх  зорилгоор хяналтын  20  цэгт  Цагдаагийн газар, Онцгой байдлын газрын алба хаагчид болон мэргэжлийн анги байгууллагын ажилтнууд замын хөдөлгөөнд оролцогч тээврийн хэрэгслийн жолооч нарт хяналт тавьж, урьдчилан сэргийлж, зөвлөгөө мэдээлэл өгнө. 
Энэхүү хяналт шалгалтын хүрээнд 450 км замын 18 цэгт буюу А0301, А0302,  Хархорин  чиглэлийн А0601, А0602 авто замууд дээр 25 км тутамд замын хяналтын байнгын цэг, 50 км тутамд замын хөдөлгөөнт хяналт болон  эрүүл мэндийн тусламж үйлчилгээний цэг, 100 км тутамд  Онцгой байдлын газрын эрэн хайх,  аврах  салбар байрлаж, яаралтай тусламж үйлчилгээг үзүүлэн урьдчилан сэргийлэх яриа таниулга хийж ажиллана. 
Иймд зам нээгдэж байгаа хэдий ч хяналт, шалгалтыг эрчимжүүлэх тул замын хөдөлгөөнд оролцохдоо хууль, дүрмийн дагуу оролцож, шаардлагагүй тохиолдолд хот, хооронд, орон нутгийн замд зорчихгүй байхыг анхаарна уу. Мөн Замын хөдөлгөөн нээх өдрүүдэд нийт нутгаар цас  орох төлөвтэй байх тул жолооч та бүхэн халтиргаа гулгаатай авто замаар хурдыг тохируулж, өөрийн болон зорчигчийн аюулгүй байдлыг хангаж оролцохыг сэрэмжлүүлж байна.