Хөдөлмөр хүнийг бүтээнэ гэдэг юутай үнэн бэ?

Монгол хүнд яагаад бусдын эд хөрөнгийг дураараа авдаг, хэнийх вэ гэдгийг нь мэддэг хэрнээ ил харагдсан зүйлээ нуугаад авчихдаг юм бол гэж та бодож байсан уу? Гадны соёлыг хэрэгжүүлж хэний ч юу ч байсан, ямар ч зүйлсийг байгаа газраас нь хөдөлгөлгүй байлгахад суралцах юмсан.

Монголчууд бид цөөхүүлээ. Тиймээс нэгнийхээ юмыг авч, зарж, борлуулаад байлгүй бусдын эд зүйлст хүрэхээ больчихвол их л сайн. Өөрөө хөдөлмөрлөхгүй хэрнээ бусдын эд зүйлсийг нүд ирмэх зуур хулгайлдаг, хумсалдаг зан, буруу сэтгэлгээнээсээ салах л чухал байна даа.

Ариун цагаан хөдөлмөрөөрөө ажиллаж, хөдөлмөрлөж байгаа иргэдийнхээ сэтгэлд нь хар толбо суутал бүү эд хөрөнгийг нь хулгайлаач! Нойргүй хонох үедээ нойргүй хонож, зарим үед хоолоо ч идэж амжихгүй байх тохиолдол байдаг. Магадгүй тэд гэр бүлийнхэн, найз нөхөддөө ч гаргах цаг завгүй ажиллаж, хөдөлмөрлөж байгаа.

Эцэстээ энэ нь хэний төлөө вэ? Үүр хүүхэд, улс эх орон, ирээдүйн амьдралынхаа сайн сайхны төлөө юм шүү дээ.

Цагдаагийн байгууллагад хулгайлах гэмт хэрэг, зөрчлийн дуудлага, мэдээлэл ирээгүй өдөр гэж үгүй.

Орон байр, авто машин, халаас гээд л хаанаас л бол хаанаас л хулгай хийнэ. Таван хошуу малаа ч хулгайлах юм.

Сэтгэлд нь харамсал гуниг төрүүлэн, хотыг нь харлуулан хулгай хийхдээ энэ хүмүүс хэрхэн ийм эд зүйл, эд хөрөнгөтэй болсон тухай та бодож үзсэн үү?

Тэд зүгээр суугаагүй, тэд хөдөлмөрлөсөн юм.

Хэрэв энэ төрлийн гэмт хэрэг үйлдвээс Эрүүгийн хуулийн

17.1 дүгээр зүйл.Хулгайлах

1.Бусдын эд хөрөнгийг хүч хэрэглэхгүйгээр, нууцаар, хууль бусаар авсан бол хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас таван жил хүртэл хугацаагаар зорчих эрхийг хязгаарлах, эсхүл зургаан сараас таван жил хүртэл хугацаагаар хорих ял шийтгэнэ.

2.Энэ гэмт хэргийг:

2.1.хүн байнга амьдрах, үйл ажиллагаа явуулах зориулалттай орон байр, тусгайлан хамгаалсан байр, агуулахад нэвтэрч;

2.2.түүх, соёл, шинжлэх ухаан, техник, технологийн хөгжилд чухал ач холбогдолтойд тооцож тусгайлан хамгаалсан эд зүйлсийг хулгайлж;

2.3.ноцтой хохирол учруулж, их хэмжээний эд хөрөнгийг хулгайлж;

2.4.учрах саадыг арилгах зорилгоор зэвсэг, тусгайлан бэлтгэсэн зэвсгийн чанартай зүйл хэрэглэж, машин механизм ашиглаж үйлдсэн бол хоёр жилээс найман жил хүртэл хугацаагаар хорих ял шийтгэнэ.

3.Энэ гэмт хэргийг:

3.1.байнга үйлдэж амьдралын эх үүсвэр болгосон;

3.2.зохион байгуулалттай гэмт бүлэг үйлдсэн бол таван жилээс арван хоёр жил хүртэл хугацаагаар хорих ял шийтгэнэ гэж заасан байна.