Цагдаагийн ерөнхий газрын Тэргүүн дэд дарга, цагдаагийн хурандаа Р.Отгонжаргал өнөөдөр /2020.01.21/ “Дэлхийн зөн Монгол Олон улсын байгууллага”ын суурин төлөөлөгч Филип Ийвэрт тэргүүтэй төлөөлөгчдийг хүлээн авч уулзлаа. 

Уулзалтын хүрээнд хүүхдийг гэмт хэрэг, зөрчлөөс урьдчилан сэргийлэх, хүүхэд хамгаалалын үйл ажиллагааны үр нөлөөг дээшлүүлэх чиглэлээр харилцан санал солилцож, тодорхой ажил, арга хэмжээг хамтран хэрэгжүүлэх ажлын хэсэг байгуулж ажиллахаар тохиролцов.

Ноён Филип Ийвэрт Монгол Улсын цагдаагийн байгууллага хүүхэд хамгааллын чиглэлээр сүүлийн жилүүдэд олон төрлийн тодорхой ажил, арга хэмжээнүүдийг зохион байгуулж, үр дүнд хүрч байгааг онцлон тэмдэглээд, өөрийн ажиллаж байсан улс орнуудтай харьцуулахад Монгол Улсын цагдаагийн байгууллага нь хүүхэд хамгааллын асуудлаар ихээхэн ач холбогдол өгч, өндөр түвшинд анхаарч ажиллаж байгаад талархал илэрхийлсэн юм.

Тэрээр цаашид Монголын хүүхдүүдийн ирээдүйн сайн сайханы төлөө хамтын ажиллагаагаа улам өргөжүүлж, хүүхдийн эрх хамгаалал, аюулгүй байдлыг хангахад Дэлхийн зөн Монгол олон улсын байгууллага дэмжлэг үзүүлж, хамтран ажиллахаа илэрхийллээ.