Улсын хэмжээнд 2019 оны эхний 11 сард 30.011 гэмт хэрэг бүртгэгдсэн нь өмнөх оны мөн үеэс 3869 хэргээр буюу 11.4 хувиар буурч, гэр бүлийн хүчирхийллийн улмаас үйлдэгдсэн гэмт хэрэг 970 бүртгэгдэж, өмнөх оны мөн үеэс 39 хэргээр буюу 4.2 хувиар өсч, бүх хэрэгт эзлэх хувийн жин 3.2 хувь болж, өмнөх оны мөн үеэс 0.5 нэгжээр өссөн байна.

Гэр бүлийн хүчирхийлэлтэй тэмцэх зорилгоор улсын хэмжээнд зохион байгуулж буй “Ойлгоё Хүндлэе” урьдчилан сэргийлэх аян нь гэр бүлийн хүчирхийллийн хор уршгийн талаарх иргэдийн мэдлэгийг дээшлүүлж, гэр бүлийн харилцааны сөрөг хандлага, хүчирхийлэгч болон хүчирхийлэлд өртөгчийн зан төлөвийг өөрчлөх, эерэг мэдээллийг өгч хүчирхийллийг үл тэвчих нийгмийн хандлагыг төлөвшүүлэх, нуугдмал гэмт хэрэг, зөрчлийг илрүүлэх, хохирогчийн эрх, хууль ёсны ашиг, сонирхолыг хамгаалах, зөрчигдсөн эрхийг сэргээхэд дэмжлэг үзүүлэхэд төрийн болон төрийн бус байгуулага, иргэдийг оролцоог нэмэгдүүлэх, хамтын ажиллагааг сайжруулах зорилготоор Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Нэгдсэн Үндэстний  байгууллагын Хүн амын сан, Жендэрийн үндэсний хороо зэрэг байгууллагатай хамтран зохион байгуулж байна. 

Цагдаагийн ерөнхий газрын Урьдчилан сэргийлэх хэлтсээс өнөөдөр /2019.12.06/ “Ub Palace” төвийн их танхимд боловсрол, урлаг соёлын олны танил эрхмүүдийг оролцуулан “Гэр бүлийн хүчирхийлэл, гэр бүлийн үнэт зүйл, эерэг харилцаа”, “Монгол эр хүний үлгэр дуурайлал, гэр бүлд ээж, эхнэр хүний нөлөө” сэдэвт хэлэлцүүлэг хоёр үе шаттай зохион байгуулагдлаа. 

Дээрх арга хэмжээнд төрийн болон төрийн бус байгууллага, “Монгол цэргийн нэгдсэн холбоо”, их, дээд сургууль, мэргэжил сургалт үйлвэрлэлийн төвийн оюутан зэрэг 3500 гаруй суралцагч болон иргэд хамрагдлаа.

Энэхүү арга хэмжээ нь гэр бүлийн аз жаргал, эерэг харилцаа, жендэрт суурилсан хүчирхийллийн эсрэг төрийн болон төрийн бус байгууллага, иргэд, ялангуяа эрэгтэйчүүд дуу хоолойгоо нэгтгэж байгаагаараа онцлог юм.