Цагдаагийн байгууллагын түүхт 100 жилийн ойг угтаж, Цагдаагийн ерөнхий газрын “Сүлд” чуулгаас соён гэгээрүүлэх ажлын хүрээнд цагдаа, дотоодын цэргийн анги, байгууллагын алба хаагчид, тэдний гэр бүлийн гишүүдийн дунд “Урлагийн наадам-2019” уралдааныг улсын хэмжээнд зохион байгууллаа.

Энэхүү урлагийн наадам гурван үе шаттайгаар зохион байгуулагдаж, нийт 44 байгууллагын алба хаагч, гэр бүлийн гишүүд оролцов.

“Урлагийн наадам-2019” тэмцээн нь “Авъяаслаг гэр бүл”-ийн багийг бүрдүүлэн оролцож байгаагаар онцлогтой.

Тус наадмын шагналтнууд, авъяаслаг оролцогчдоос бүрдсэн “Гала” тоглолт 2019 оны 10 дугаар сарын 28-ны өдөр Цагдаагийн ерөнхий газрын “Сүлд” чуулгын концертын тэнхимд боллоо.

Энэхүү урлагийн наадмын “Авъяаслаг гэр бүл”-ийн төрөлд Ховд аймаг дахь цагдаагийн газрын Холбоо мэдээллийн инженер, цагдаагийн дэслэгч Б.Мөнхтулга, “Гоцлол дуу”-ны төрөлд Дотоодын цэргийн 05 дугаар ангийн харуулчин, дэд ахлагч С.Нямбаяр, “Гоцлол бүжиг”-ийн төрөлд Дархан-Уул аймаг дахь цагдаагийн газрын хэсгийн байцаагч, цагдаагийн дэслэгч Ч.Бямбацогт, “Гоцлол хөгжим”-ийн төрөлд Завхан аймаг дахь цагдаагийн газрын хэсгийн байцаагч, цагдаагийн дэслэгч Б.Батзаяагийн гэргий Я.Анхсарнай, “Ардын язгуур урлаг”-ийн төрөлд Тээврийн цагдаагийн албаны Баянзүрх дүүрэг дэх замын цагдаагийн хэлтсийн цагдаа-зохицуулагч, цагдаагийн дэд ахлагч А.Цэнгэл, “Уран уншлага”-ын төрөлд Булган аймаг дахь цагдаагийн газрын эрүүгийн тасгийн эдийн засгийн ахлах мөрдөгч, цагдаагийн ахмад Т.Баттөрийн гэргий Г.Гандиймаа нар тус тус тэргүүн байр эзэллээ.