Цагдаагийн Ерөнхий Газрын Дарга бөгөөд Интерполын Үндэсний төв товчооны дарга, цагдаагийн хурандаа С.Баатаржав өнөөдөр /2019.09.23/ “Соёлын өвийн хууль бус эргэлттэй тэмцэх нь” сэдэвт Интерполын үндэсний ажлын уулзалтыг зохион байгуулах зорилгоор  Монгол Улсад айлчилж байгаа  Олон улсын эрүүгийн цагдаагийн байгууллага-Интерполын Ерөнхий нарийн бичгийн даргын газрын Урлагийн бүтээлийн эсрэг гэмт хэрэгтэй тэмцэх хэлтсийн дарга ноён Корадо Катесиг хүлээн авч уулзлаа. 

Уулзалтын эхэнд цагдаагийн хурандаа С.Баатаржав: "Монгол Улс нь 1991 онд Олон улсын эрүүгийн цагдаагийн байгууллага-Интерполд гишүүнээр элссэнээс хойш өнөөг хүртэлх хугацаанд Интерполоос санаачилсан аливаа ажил, арга хэмжээнүүдийг бүрэн дэмжиж, идэвхтэй хамтран ажиллаж ирсэн"  талаар  ярьж, “Соёлын өвийн хууль бус эргэлттэй тэмцэх нь” сэдэвт энэ удаагийн уулзалт нь Интерполоос Монгол Улсад анх удаа зохион байгуулж байгаа үндэсний хэмжээний  ажлын уулзалт болохыг онцолсон юм. Мөн цагдаагийн байгууллагын алба хаагчдаас гадна соёлын өвийг хамгаалах чиглэлээр тодорхой чиг үүргүүдийг хэрэгжүүлэн ажилладаг 10 гаруй төрийн байгууллагуудын удирдах албан тушаалтнууд болон мэргэжилтэн, алба хаагчид уригдан оролцож байгаа туйлын чухал ач холбогдолтой  байгаа талаар хэллээ.

Ноён Корадо Катесигийн зүгээс энэ удаагийн үндэсний ажлын уулзалтыг Интерполтой хамтран зохион байгуулахад идэвх санааачлага гарган ажилласан явдалд Монгол Улсын Цагдаагийн ерөнхий газарт талархал илэрхийлээд, Интерполын зүгээс соёлын өвийн хууль бус эргэлттэй холбоотой гэмт хэрэгтэй тэмцэх чиглэлээр Монгол Улсын цагдаагийн байгууллагын алба хаагчдын мэдлэг, ур чадварыг дээшлүүлэх чиглэлээр цаашид шаардлагатай дэмжлэгийг үзүүлж, нягт хамтран ажиллах болно гэлээ.