Сэтгүүлч Д.Улаанхүүхэн /Сүхбаатар аймаг/

Амьдралын хамгийн амттай, хамгийн эрч хүчтэй, хамгаас нандин дурсамж бүхэн залуу насанд л байдаг. Ялангуяа ажилдаа эзэн нь, сонирхсон зүйлийнхээ сор нь болж явах шиг сайхан зүйл хаа байхав гэж амжилтын эзэд ярьдаг.
Тийм л сор болсон залуусын нэг Зоригтын Баясгалан. Сүхбаатар аймгийн Цагдаагийн газрын ахлагчаар ажиллаж буй тэрээр бие хамгаалах урлагийн холбооны 1 дүгээр зэргийн шүүгч. Монгол улсын зургаан удаагийн аварга, ДАШТ-ний мөнгөн медальт тамирчин. ИЗИС-ийн Иргэний аюулгүй байдал, бие хамгаалах эрх зүйн ангийг төгсөөд, төрөлх нутагтаа ажиллаж байна. Бие хамгаалах урлаг таэквандо, кикбоксын спортоор хичээллэж, улс, бүс, тив дэлхийн уралдаан тэмцээнд тогтмол амжилт гаргаж яваа цагдаагийн залуу боловсон хүчин.
Хүүхэд ахуйдаа цагдаа ах нарыг харж, ийм бахархам сайхан мэргэжилтэй болж, ажиллахсан гэдэг нууцхан мөрөөдлөө биелүүлсэн жаалхүү цагдаагийн албанд ажиллаад даруй зургаан жил болжээ. Энэ хугацаанд бие хамгаалах урлагаар тогтмол хичээллэж, амжилт гарган, басхүү эзэмшсэн мэргэжил, хүлээсэн үүрэгтээ эзэн нь болж яваа, чадварлаг залуусын нэг хэмээн мөрдөс нэгт хамт олон нь үнэлж байна лээ. Ажлын гараагаа эхэлсэн цагаасаа л аймгийн цагдаагийн байгууллагын нэрийг өндөрт өргөж, гаргасан амжилтуудаа бататгаж яваа нь түүнийг хамт олныхоо дунд ийн бахархан дууриах эздийн нэг болгожээ.
Зургаан хүүхэдтэй айлын бага хүү. Гурван ахынхаа даруулга доор ухаажиж, дүүгийнхээ түшиг нь болон залж яваа ах. Сургуулийн босгыг дөнгөж алхсан жил аав нь, оюутны ширээнд суусан жил ээж нь тэнгэрт одсон нь З.Баясгаланд бие даах, ачаа үүрэх, амьдралын замын урт харгуйд хөтлөн оруулжээ.
10 жилийн сургуульд байхдаа л зуныхаа амралтаар нийслэл хотод ажиллаж, өөрийнхөө болон дүүгийнхээ бүхий л санхүүгийн хэрэгцээг хангадаг байж.
Сурагч насандаа багагүй хөдөлгөөнтэй, өөрөөр хэлбэл “атаман” хүүхэд байсан ч жинхэнэ зоотой эр дээ хэмээн үеийнхэн нь баталсан.
Ах нарынхаа үгээр хэлсэн болгоноос нь татгалздаггүй байсан болохор гэрийнхээ хамгийн ажилтай бас хөдөлмөрч хүүхэд болон өсөн нь их спортод ийн амжилт гаргахад нөлөөлсөн байх магадлал бий.
Хатуу, зөөлөн араншинтай гэдгээ амьдрал түүнд балчраас нь эхлээд ойлгуулсан болоод ч тэр үү хөдөлмөрлөх, тэмцэх чухал гэдгийг мэдэрч өссөнөө хэрэгжүүлсээр яваа. Оюутны дөрвөн жилд сурахын хажуугаар хамгаалалтын албанд ажиллаж, өөрийнхөө сургалтын төлбөр болон дүүгийнхээ сургуулийн зардлыг давхар шийдсээр амжилттай төгсчээ.
Зоригтой, шийдэмгий, дайчин чанар нь үеийнхнийхээ болон хамт олных нь дунд сайн нэрийг авчирсан нь бахадмаар. Тулааны спорт хүнд маш том ёс зүй, хатуужил тэсвэрийг өгдөг. Хамт байхад уйдаахгүй хөгжилтэй, барагтай л бол уурладаггүй гэж найзууд нь тодотгосон юм.
Төлөв төвшин, аливаад нуруутай ханддаг чанарыг өвлөсөн хэмээн ойр дотныхон нь тодорхойлдог. Хэдийгээр удаан хамт байгаагүй ч аав шигээ л байхыг тэрээр хүсдгээ нуугаагүй.
Оюутан байхдаа мэргэжлийнхээ дагуу бие хамгаалах арга техникийг гаргууд сурч байсанаараа үеийнхнээсээ ялгарч байжээ. Дурлаж сонирхон одоог хүртэл хичээллэж яваа энэ спортын А-г заасан багш Үндэсний бие хамгаалах урлагийн спортын мастер Д.Алтанхүү, Д.Отгонбаяр нараараа бахархдаг. Мөн спортын мастер Н.Нэргүй багшаасаа ч их зүйлийг сурсан болохоор хүндэлж бахархдаг гэсэн.
Өөрийгөө болон бусдыг хамгаалах үндсэн үүрэгтэй тулааны спортоор амжилттай хичээллэдэг алба хаагчаа уралдаан тэмцээнд орох бүрт аймгийн Цагдаагийн газрын үе үеийн удирдлагууд байнга дэмжиж, урамшуулдаг болохоор эрч хүч ундардаг хэмээн ярисан юм.
Тэмцээнд орох бүх боломж нөхцөлөөр хангаж, боломжтой бүх нөхцөлөөр нийгмийн асуудлыг нь шийдэж өгдөг, амжилт гаргаад ирэхэд аав, ээж шиг нь тосон авч, шагнаж урамшуулдаг өнөөгийн Цагдаагийн газрын дарга, дэд хурандаа Ц.Ганзориг болон бусад удирдлагууддаа талархаж явдаг.
Оролцсон тэмцээн бүрээс амжилтын буухиа дагуулдаг түүний хашиж буй үндсэн алба хөнгөн биш. Эргүүлийн цагдаагийн байнгийн бэлэн байдалд ажиллахдаа спортынхоо бэлтгэлийг амжуулахыг хичээнэ. Ажил, амьдралынхаа бүхий л цагийг зохицуулж, бэлтгэл сургуулилтаа тасралтгүй хийсээр тэмцээнд ордог.

Ихэвчлэн хөнгөн жинд тулалддаг болохоор багагүй жин хаях шаардлагтай. Зарим үед ажлынхаа чөлөөгөөр зөвхөн гүйлтийн дасгал хийсээр тэмцээндээ ордог аж.
Тулааны спортын аливаа уралдаан тэмцээнд түүний хамгийн хүчтэй өрсөлдөгч нь Цагдаагийн тусгай тасгийн алба хаагчид гэнэ. Тогтмол бэлтгэл сургуулилт хийж, мэргэжлийн түвшинд бэлтгэгддэг тэдний нэгэн адил суралцвал богино хугацаанд ижил хэмжээнд очно хэмээн найзууд нь ярьж байсан юм.
Нутагтаа л ажиллаж амьдрах сонирхолтой гэнэ. Удахгүй офицерын курсэд сурна. Цолоо ахиулна, мэдлэг, мэргэжлээ дээшлүүлнэ, дээрээс нь мэдээж их спортын амжилтаа ч үргэлжлүүлнэ. Бодсон санасан зүйл их бий хэмээн ярьж буй залуу ахлагч ирээдүйгээ тэр чигээр нь гэрэл гэгээтэйгээр төсөөлж буй нь илт.
Үүнээс илүүг хийх эрч хүчээр цэнэглэгдсэн түүний ар гэр, хайрт хань нь хамгийн сайн ойлгож дэмждэг болохоор амжилт ойрхон байдаг хэмээсэн юм.
З.Баясгалангийн гаргасан амжилтынх нь он цагийн товчоон нь ирээдүйнх нь их замын эхлэл мэт ажгуу. Баян, уужим амьдралынхаа эхэнд бахархам алдараар нэрээ цууриатуулж яваа цэл залуу албан хаагчаараа Сүхбаатарын цагдаагийнхан бахархдаг.

Өөрийнхөө залгамж халаа, удмыг нь үргэлжлүүлэх гурван хүүхэд, ханиа халамжлах, тангараг өргөсөн алба нэр төртэй гүйцэтгэх гээд өчүүхэн ч чөлөө завгүй амьдралын урсгалыг сөрж яваа дайчин залуу цагдаа таны дараа дараагийн амжилтын хуудас тань зузаарсаар байх болтугай.