Цагдаа, дотоодын цэргийн байгууллагын удирдах ажилтны сургалт, зөвлөгөөн энэ сарын 24-26-ны өдрүүдэд Улаанбаатар хотноо боллоо.

Сургалт, зөвлөгөөний төгсгөлд Цагдаагийн ерөнхий газрын дарга, дотоодын цэргийн командлагч, цагдаагийн хурандаа С.Баатаржав удирдах ажилтнуудад мэдээлэл хийж, цаашид анхаарч ажиллах, хэрэгжүүлэх ажлын үүрэг чиглэл өгсөн юм. Тэрбээр “Цагдаа, дотоодын цэргийн байгууллагаас 2018 онд дэвшүүлсэн зорилтыг ханган биелүүлэхийн тулд бид нэгдмэл санаа зорилго, нэг бодлого, шийдвэртэй, нэг баг болон ажиллаж үр дүнд хүрэх ёстой. Үүнд удирдах ажилтнууд та бидний манлайлал, идэвх, санаачилга чухал гэдгийг онцгой анхаарч ажиллах шаардлагатай. Та бүхэн өөрт олгосон эрх мэдлийг хуулийн хүрээнд зөв ашиглаж, үүргээ ухамсарлан, алба хаагчдад үлгэр дуурайлал болж, зарчимч, шударга, хуульч ажиллагаагаар манлайлан, тэднийг идэвхжүүлж, урам зориг өгч, дэмжиж ажиллахыг үүрэг болгов. Мөн Шинэчлэн батлагдсан хууль, журам, тушаал, шийдвэрийг хэрхэн хэрэгжүүлэх талаар сургалт, зөвлөгөөний үеэр авсан мэдээллийг алба хаагчдад шуурхай хүргэж, судлуулах ажлыг тогтмол зохион байгуулж, үйл ажиллагаандаа нэг мөр, зөв хэрэглэж, хэрэгжилтэд нь тавих хяналтыг сайжруулах хэрэгтэйг онцоллоо.

Мөн сургалт, зөвлөгөөний хаалтын үйл ажиллагаанд Монгол Улсын Их Хурал, Засгийн газрын гишүүн, Хууль зүй, дотоод хэргийн сайд Ц.Нямдорж оролцон үг хэлж, зөвлөгөөнд оролцогчдод үүрэг чиглэл өгөв.

Цагдаагийн ерөнхий газрын дарга, дотоодын цэргийн командлагчаас албад, харьяа газар, хэлтсийн дарга нартай 2018 оны менежерийн үр дүнгийн гэрээ байгуулснаар цагдаа, дотоодын цэргийн байгууллагын удирдах, ажилтны сургалт зөвлөгөөн өндөрлөж байна.

МОНГОЛ ТӨРИЙН ЦАГДААГИЙН СҮЛД ХИЙМОРЬ, ЦОГ ЖАВХАА ҮҮРД МАНДАН БАДРАХ БОЛТУГАЙ.