Монгол Улсын Засгийн газраас Мансууруулах эм, сэтгэцэд нөлөөт бодисын хууль бус эргэлттэй тэмцэх Үндэсний хөтөлбөрийг баталсан. Энэхүү хөтөлбөрийг хэрэгжүүлэх ажлын хүрээнд Хууль зүй, дотоод хэргийн яамнаас АНУ-ын Элчин сайдын яам, Эрүүл мэндийн яам, Боловсрол, соёл, шинжлэх ухаан, спортын яам, Сэтгэцийн эрүүл мэндийн үндэсний төвтэй хамтран Монгол Улсад “Мансуурлын эмчилгээ, урьдчилан сэргийлэлт”-ийн Олон улсын Коломбо хөтөлбөрийг нэвтрүүлэх сургалтыг нэгдүгээр сарын 08-наас 16-ны өдрүүдэд Хууль сахиулахын их сургуульд зохион байгууллаа.

Энэхүү сургалтад Хууль зүй, дотоод хэргийн яам, Боловсрол, соёл, шинжлэх ухаан, спортын яам, Сэтгэцийн эрүүл мэндийн үндэсний төв, Цагдаагийн ерөнхий газар, Шүүхийн шинжилгээний үндэсний хүрээлэн, Хууль сахиулахын их сургууль, Ерөнхий боловсролын сургуулиудаас нийт 21 хүн хамрагдаж, үндэсний сургагч багшийн сертификат гардан авлаа.

Уг сургалтын хүрээнд АНУ-ын Коломбо план олон улсын хөтөлбөрийн сургагч багш нар  мансууруулах төрлийн бодисын хэрэглээг багасгах, хэрэглэсэн нөхцөлд хэрхэн эмчлэх, арга техникийг зааж сургах, өсвөр үеийнхнийг энэ төрлийн гэмт хэргээс урьдчилан сэргийлэх, үр нөлөөг ойлгуулах, нийгмийн болон сэтгэл зүйн талаар хэрхэн үйлчилгээ үзүүлэх чиглэлээр сургагч багш бэлтгэх сургалтыг явуулсан бөгөөд цаашид Монгол Улсын 21 аймаг, Нийслэлийн 9 дүүрэгт үргэлжлэн явагдах юм.

АНУ-ын Коломбо план олон улсын хөтөлбөрийг 1950-иад оноос эхлэн дэлхийн улс орнуудад нэвтрүүлсэн бөгөөд манай орны хувьд 47 дахь улс нь болж байгаа юм байна.