Монгол Улсын Засгийн газраас иргэдийг орон сууцжуулах, хөнгөлөлтэй зээлийн нөхцөлөөр орон сууцны барилга барих талаар авч хэрэгжүүлэх бодлого, хөтөлбөр арга хэмжээ, ЦЕГ-ын даргын баталсан “ Гэр орон сууц, нийгмийн байдал, эрүүл мэндийн хамгаалал хөтөлбөр”-ийн хүрээнд төв, орон нутгийн цагдаагийн байгууллагын алба хаагчдыг орон сууцжуулах, нийгмийн асуудлыг шийдвэрлэх зах зээлийн үнээс хямд өртгөөр орон сууцны барилга барих ажлыг дэс дараатай авч хэрэгжүүлснээр 2000 шахам алба хаагч орон сууцтай болсон.

Мөн Цагдаагийн Ерөнхий газрын Санхүү, аж ахуйн албанаас хөдөлгөөнт эргүүлийн автомашинуудад хүйтний улирлын нэмэгдэл шатахуун олгож, шаардлагатай алба хэлтсүүдэд парк шинэчлэл хийсэн нь албаны бэлэн байдлыг хангах, шатахуун хүрэлцэхгүй, дуудлага мэдээлэл хоцрож байна гэсэн иргэдийн гомдол санал эрс багассан үр дүнтэй байгаа талаар алба хаагчид ярьлаа.

Үүний зэрэгцээ улсын хэмжээнд гэр бүлийн хүчирхийлэлд өртсөн иргэд, насанд хүрээгүй хүүхдээс мэдүүлэг авахад зориулалттай 82 өрөөг ашиглалтанд оруулж, үйл ажиллагаандаа нэвтрүүлсэн нь хүний эрх, эрх чөлөө, алба хаагчийн аюулгүй байдлыг хангах, авилгаас урьдчилан сэргийлэх зэрэг олон давуу талтай шинэлэг ажил юм.

Хяналт шалгалтын явцад байнга зам дээр үүрэг гүйцэтгэдэг Улаанбаатар цагдаагийн хүрээний замын цагдаа, авто баазын жолооч нартай уулзахад -40 хэмийн хүйтэнд дулаанаа хадгалдаг нохойн арьсан дотортой гутал, бээлийг хангалтаар олгосон нь тэдний эрүүл мэнд, аюулгүй байдлыг хангахад тустай байгааг алба хаагчид онцоллоо.

Цагдаагийн ерөнхий газраас эрүүлжүүлэх, баривчлах байранд ажиллаж байгаа цагдаагийн алба хаагчдын ажиллах орчиныг сайжруулах, эрүүлжүүлэгдэж байгаа хүмүүсийн амь нас, эрүүл мэндийг хамгаалах, эмнэлгийн анхан шатны тусламж үйлчилгээг шуурхай хүргэх зорилгоор нийслэлийн 9 дүүрэг, 21 аймаг дахь цагдаагийн газар, хэлтсүүдийн эрүүлжүүлэх байранд 10 нэр төрлийн эм, бэлдмэл, эмнэлгийн хэрэгсэлийг үйл ажиллагаандаа хэрэглэж эхлээд байна.

Эдгээр ажлуудыг хэрэгжүүлснээр алба хаагчдын ажиллах нөхцлийг сайжруулах, иргэдэд түргэн шуурхай үйлчилэх, албаны бэлэн байдлыг хангах томоохон үр дүн гарч байгаа юм.