Баянзүрх дүүрэг дэх цагдаагийн гуравдугаар хэлтсийн алба хаагчид өчигдөр /2017.12.21/ үйл ажиллагааны тайлангийн хурлаа хийж энэ оныхоо ололт амжилтыг дүгнэж, тэргүүний алба хаагчдаа шагнаж урамшууллаа.

Тус цагдаагийн хэлтэс нь гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах хуулиар хүлээсэн үүргээ амжилттай гүйцэтгэж, Нийслэлийн цагдаагийн газрын “Бүтээлч тэргүүний байгууллага”-аар, Хэрэг бүртгэх тасаг Хэрэг бүртгэх албаны “Тэргүүний тасаг” хамт олноор шалгарсан юм.

Мөн Нийслэлийн цагдаагийн газрын “Хөдөлмөрийн аварга” ажилтнаар хэрэг бүртгэгч, цагдаагийн ахлах дэслэгч Э.Саруул, Нийслэлийн цагдаагийн газрын “Тэргүүний мөрдөгч”-өөр мөрдөгч, цагдаагийн ахлах дэслэгч Э.Маргад, Нийслэлийн Цагдаагийн газрын “Тэргүүний жижүүрийн офицер”-оор жижүүрийн ахлах офицер, цагдаагийн хошууч Л.Очбадрах шалгарч, ажил мэргэжлээрээ хошуучилжээ. Тэргүүний алба хаагчдад өвлийн өвгөн хүрэлцэн ирж бэлэг гардуулсан нь онцгой содон үйл явдал байв.

Баянзүрх дүүрэг дэх цагдаагийн гуравдугаар хэлтсийн дарга, цагдаагийн хурандаа Ц.Ариунбат “Бид  ирэх 2018 оныг гэмт хэрэг, зөрчлийн гаралтыг бууруулах, урьдчилан сэргийлэх ажлын үр нөлөөг дээшлүүлж, шинэ түвшинд гаргах жил болгон зарлаж, гэмт хэргээс урьдчилан сэргийлэх ажилд цагдаагийн алба хаагч манлайлж, иргэд, аж ахуйн нэгж, төрийн болон төрийн бус байгууллагын оролцоог нэмэгдүүлсэн, үр дүнд хүрсэн жил болгож ажиллана” гэж ярилаа.