Цагдаагийн байгууллагын шилдэг хэсгийн төлөөлөгчийг шалгаруулах, тэдний мэдлэг, ур чадвар, ажлын үр дүнг дээшлүүлэх, албандаа хандах эерэг хандлагыг нэмэгдүүлж, гэмт хэрэг зөрчлийг илрүүлэх арга тактикийг сайжруулах зорилгоор “Шилдэг хэсгийн төлөөлөгч” уралдааныг анх удаа зохион байгуулах гэж байна. Энэхүү уралдаан нь Хууль зүй, дотоод хэргийн сайдын нэрэмжит болгон зохион байгуулагдаж буйгаараа онцлог юм.

Шилдэг хэсгийн төлөөлөгч уралдааны эцсийн шатны шалгаруулалт энэ сарын 13-15-ны өдрүүдэд Цагдаа, дотоодын цэргийн сургалтын нэгдсэн төвд болох бөгөөд нутаг дэвсгэр хариуцсан цагдаагийн газар, хэлтсээс нэг, хоёрдугаар шатны шалгуурыг амжилттай давж шалгарсан 14 хэсгийн төлөөлөгч оролцож ур чадвар, авхаалж самбаагаа сорих аж.

Тэд цагдаагийн байгууллага болон хэсгийн төлөөлөгчийн үйл ажиллагаа, албаны бэлэн байдал, нийгмийн баталгааг сайжруулах чиглэлээр өнөөгийн үйл ажиллагаанд тулгамдсан асуудлыг хөндсөн сэдвийн хүрээнд эсээ бичих, цагдаагийн байгууллагын мэдээллийн цахим сан болон компьютерийн хэрэглээний програм хангамж ашиглах чадвар, логик сэтгэлээ IQ чадварын шалгалт өгөх юм байна. Мөн хууль эрх зүй, гадаад хэлний мэдлэгээрээ өрсөлдөхөөс гадна албаны галт зэвсэг, бие бялдрын бэлтгэлжилт болон тээврийн хэрэгсэл жолоодох, мал зүслэх, шүдлэх, им тамга нэрлэх зэрэг ур чадвараа сорьж, шилгүүдээ тодруулах юм.