Өнөөдөр /2017.10.06/ сургалтад амжилттай хамрагдсан дүүрэг, орон нутгийн цагдаагийн газар, хэлтсийн 20 алба хаагч сургалтын сертификатаа гардан авлаа. Энэхүү анхан шатны сургалтыг ЕАБХАБ-аас зохион байгуулсан сургагч багш бэлтгэх сургалтад амжилттай хамрагдсан манай цагдаагийн алба хаагчид, тус байгууллагын олон улсын сургагч багш нарын багтай хамтран зохион байгуулснаараа онцлогтой юм.

Сургалтад хамрагдсан цагдаагийн алба хаагчдад сертификат гардуулах ёслолын ажиллагаанд ЦЕГ-ын Дэд дарга, цагдаагийн хурандаа Ч.Болдбаатар оролцлоо. Тэрбээр сургалтын ажиллагааг хааж “Бид энэ удаагийн сургалтыг Европын аюулгүй байдал хамтын ажиллагааны байгууллагатай ирээдүйд хамтран хэрэгжүүлэх дараа дараагийн олон удаагийн арга хэмжээний эхлэлийг тавьсан амжилттай алхам боллоо гэж үзэж байна.

Ялангуяа Европын аюулгүй байдал хамтын ажиллагааны байгууллагаас хүн худалдаалах гэмт хэрэгтэй тэмцэх чиглэлээр авч хэрэгжүүлж буй:
- Гэмт этгээдийг илрүүлэн, мөрдөн шалгаж, яллах (Prosecution)
- Тухайн төрлийн гэмт хэргээс урьдчилан сэргийлэх (Prevention)
- Хохирогчыг хамгаалах (Protection)
- Хамтын ажиллагаа (Partnership)
гэсэн үндсэн дөрвөн тулгуурт бодлого чиглэлийн хүрээнд цагдаагийн байгууллагын хүн худалдаалах гэмт хэрэгтэй тэмцэх, урьдчилан сэргийлэх чадавхийг сайжруулах, төрийн болон төрийн бус байгууллагуудтай хамтран ажиллах хамтын ажиллагааг боловсронгуй болгох, энэ төрлийн гэмт хэрэгтэй тэмцэх, хохирогчдыг хамгаалах, сэтгэл зүй, нийгэм, эдийн засгийн туслалцаа үзүүлэх үндэсний механизмийг боловсронгуй болгох зэрэг үндсэн чиглэлүүдээр танай байгууллагтай цаашид нягт хамтран ажиллаж хамтарсан төсөл, хөтөлбөрүүдийг хэрэгжүүлэх асар их эрмэлзэлтэй байна” гэж хэллээ.