"ЦАГДАА" ЭМХТГЭЛИЙН 3-Р УЛИРЛЫН ДУГААР ХЭВЛЭГДЭН ГАРЛАА

2017-10-04 00:00:00

2497

Энэ удаагийн дугаартаа цагдаагийн байгууллагын 3-р улиралд зохион байгуулагдсан онцлог үйл явдлуудыг тоймлон хүргэж, “Дугаарын зочин”-оор Цагдаагийн Ерөнхий газрын Гадаад харилцааны хэлтсийн дарга, цагдаагийн дэд хурандаа Г.Баясгаланг урьж цагдаагийн байгууллагын гадаад харилцааны талаар ярилцсан юм.

“Генералын үг” буландаа Тулгар төрийн 2226, Их Монгол Улсын 811, Ардын хувьсгалын 96 жилийн ой, Үндэсний их баяр наадмын босгон дээр Монгол улсын гавьяат хуульч цолоор шагнагдсан хошууч генерал Д. Сандаг-Очиртой ярилцлага хийж, цагдаагийн бие бүрэлдэхүүнд ажиллах болсон үеэс эхлээд генерал цолонд хүрч, удирдах албан тушаал хашсан түүхэн цагуудын тухай хуучилсан юм.

"Онцлох үйл явдал" буландаа Дэлхийн цагдаагийн олимпод амжилт гаргасан алба хаагчдын амжилтын талаар сурвалжлага бэлтгэж, цагдаагийн байгууллагын хуулиар хүлээсэн чиг үүрэг, дэвшүүлсэн зорилтыг хэрэгжүүлэхэд хүчин чармайлт гарган эх орон, төр засаг, түмэн олныхоо өмнө өргөсөн тангараг, хүлээсэн үүргээ нэр төртэй биелүүлж, эрхэлсэн ажилдаа идэвх зүтгэл, үр бүтээл гаргаж ажиллаж байгаа цагдаагийн байгууллагын алба хаагчдадаа цол олгож, шагнал гардуулсан үйл ажиллагааг онцолсон юм.

“Ахлагч бүрэлдэхүүн ярьж байна” буландаа Засгийн газрын шагнал хүртсэн, цагдаагийн ахлах ахлагч Ж.Хадбаатарыг онцолж, Түүх-Архив булангаараа НАХЯ-ны түүхт 50 жилийн ойн үйл явдал, “Энхийг сахиулагч” Өмнөд судан улсад явагдаж буй НҮБ-ын мандаттай энхийг дэмжих ажиллагаанд оролцсон цагдаагийн алба хаагч нарын талаар мэдээлэл бэлтгэн, "Соёл урлаг" буландаа "Сүлд" чуулгын уран бүтээлчдийн " Иргэн тантай үргэлж хамт" сурвалжлага бэлтгэн нийтэллээ.

Дугаар бүхнээрээ дамжуулан алба хаагч нартаа шинэлэг мэдээ мэдээллийг хүргэхийг зорьдог “Цагдаа” эмхтгэлийн шинэ дугаар ийнхүү та бүхний өмнө дэлгэгдлээ

РЕДАКЦИЙН ЗӨВЛӨЛ

ШИНЭ МЭДЭЭ