100 жил
“ЦАГДААГИЙН ЁС ЗҮЙН ТӨЛӨВШИЛ, ХАНДЛАГА” СУРГАЛТ БОЛЛОО
“ЦАГДААГИЙН ЁС ЗҮЙН ТӨЛӨВШИЛ, ХАНДЛАГА” СУРГАЛТ БОЛЛОО
Цагдаагийн албаны тухай хуулийн наймдугаар бүлгийн 81 дүгээр зүйлийн 81.6-д “Сахилгын шийтгэл хүлээсэн алба хаагч хувийн зардлаар ёс зүйн сургалтад хамрагдах үүрэгтэй” гэж заасан. Сахилга, ёс зүйн зөрчил гаргасан алба хаагчдад зориулсан тэдний аливаа асуудалд хандах хандлага, сэтгэлгээг өөрчлөх, ажил мэргэжлийн ур чадварыг дээшлүүлэх “Цагдаагийн ёс зүйн төлөвшил, хандлага” сургалтыг ЦЕГ-ын Сургалтын нэгдсэн төвийн “Нарстай ам” дахь хээрийн сургалтын хэсэгт зохион байгуулсан юм. Анх удаа зохион байгуулж буй энэхүү сургалтад 44 алба хаагч хамрагдлаа.
Сургалт нь хуулийн хэрэгжилтийг хангах, алба хаагчдаас гаргасан сахилга, ёс зүйн зөрчлийг бууруулах, давтан гаргахаас урьдчилан сэргийлэх зорилгоор алба хаагчдын ёс суртахууны мэдлэгийг дээшлүүлэх, харилцааны чадварыг хөгжүүлэх, үүрэг хариуцлагаа ухамсарлах, үйл ажиллагаандаа аливаа дутагдал гаргахгүй байх, мэргэжлийн ур чадварыг дээшлүүлэх зорилготой.
Тиймээс ч сургалтад хамрагдсан алба хаагчид хувь хүний хөгжил, багаар ажиллах чадвар, уур бухимдал, стрессээ хэрхэн дарах вэ? зэрэг сэдвээр хоёр өдрийн хугацаанд номын дуу сонсож, сургалтын төгсгөлд сертификат гардаж авсан.
Сургалтад хамрагдсан алба хаагчдын төлөөлөл “Сургалтад хамрагдана гээд ирэхдээ шийтгэл юм шиг ойлгож байсан. Гэтэл энэ сургалт бол боломж, бололцоо байлаа. Бид олон зүйлийг сонсож, мэдэж авлаа. Эндээс сурсан зүйлээ бололцооныхоо хэрээр бусад алба хаагчдадаа хэлж, зөвлөнө” гэж ярьж байлаа.
