100 жил
“ЦАГДААГИЙН ОЛИМП”-ИЙН СОНИН САЙХНЫГ “ЯВЛАА, ИРЛЭЭ” НЭВТРҮҮЛГЭЭС...
Монголын мэдээ телевиз /МҮОНТВ-ийн II суваг/-ээр өнөөдөр оройн 21:00 цагаас үзэгчдэд хүрэх “ЯВЛАА, ИРЛЭЭ” нэвтрүүлэгт ЦЕГ-ын харьяа “Хүч” спорт хорооны дарга, цагдаагийн хурандаа Д.Батмөнх оролцлоо. Тэрбээр “ЯВЛАА, ИРЛЭЭ” нэвтрүүлэгт “Цагдаагийн олимп”-ийн сонин сайхан, Монголын цагдаагийн тамирчин-алба хаагчдын тухай яриа дэлгэжээ.
АНУ-ын Лос-Анжелос хотноо энэ сарын 7-17-ны өдрүүдэд зохион байгуулагдсан дэлхийн “Цагдаагийн олимп”-д Монгол Улсын цагдаагийн байгууллагын баг тамирчид эх орноо төлөөлөн спортын найман төрөлд өрсөлдөж, 33 гаруй медаль хүртсэн бахархам амжилт үзүүлсэн билээ.
1967 оноос хойш хоёр жилд нэг удаа уламжлал болгон зохион байгуулагдах болсон “Цагдаагийн олимп”-д манай улсын цагдаагийн алба хаагчид гурав дахь удаагаа оролцоод ирсэн юм. 2011 онд АНУ-ын Нью-Йорк хотноо болсон энэхүү тэмцээнд Монгол Улсын баг анх удаагаа оролцож 17 офицер, ахлагчийн бүрэлдэхүүнтэй баг тамирчдыг “Хүч” спорт хорооны дарга, цагдаагийн хурандаа Д.Батмөнх ахалж явжээ. Манай тамирчин-алба хаагчид спортын зургаан төрөлд өрсөлдөж, 10 алт, долоон мөнгө, гурван хүрэл нийт 20 медальтай, амжилт дүүрэн эх орондоо ирсэн байдаг юм.
