ЦАГДААГИЙН СУРГАГЧ АХЛАГЧ Ж.ХАДБААТАР МОНГОЛ УЛСЫН ЗАСГИЙН ГАЗРЫН ХҮНДЭТ ӨРГӨМЖЛӨЛӨӨР ШАГНАГДЛАА.

Ажил үйлсээрээ бусдыгаа манлайлсан нэр бүхий хүмүүст Монгол Улсын Засгийн газар Үндэсний их баяр наадмын өмнө “Хүндэт өргөмжлөл”-өө хүртээдэг билээ. Энэ уламжлалын дагуу өнөөдөр Монгол Улсын Ерөнхий сайд Ж.Эрдэнэбат тэргүүтэй Засгийн газрын гишүүд Төрийн ордны Ёслол хүндэтгэлийн танхимд уг шагналыг гардууллаа.
Цагдаагийн алба хаагчдаас Баянзүрх дүүргийн цагдаагийн 2-р хэлтсийн цагдаа жолооч, Сургагч ахлагч Ж.Хадбаатар Монгол Улсын Засгийн газрын хүндэт өргөмжлөлөөр шагнагдлаа.
Тэрээр Монгол төрийн цагдаагийн байгууллагад 23 дахь жилдээ ажиллаж байна. Энэ хугацаанд 5250 удаа 4450 цагийн эргүүл, жижүүрийн үүрэг гүйцэтгэж, Мэдээлэл шуурхай удирдлагын төвөөс 2720 дуудлага мэдээлэл хүлээн авч 32 гэмт хэргийг халуун мөрөөр нь шуурхай эрэн сурвалжилж, илрүүлэн 40 гэмт хэргийг үйлдэл дээр нь таслан зогсоож, хэргийн газрын хамгаалалтанд 560 удаа ажилласан байна.

Сургагч ахлагч Ж.Хадбаатар нь албаны бэлэн байдлыг хангаж, гэмт хэрэгтэй тэмцэх нийтийн хэв журам хамгаалах боло олон нийтийн аюулгүй байдлыг хангах үндсэн чиг үүргээ нэр төртэй биелүүлж ирсэн манлайлагч алба хаагч нарын нэг юм.
Шагнал гардуулсны дараа Монгол Улсын Ерөнхий сайд Ж.Эрдэнэбат хэлэхдээ “Салбар байгууллагынхаа шилдгээр шалгарсан та бүхэндээ Засгийн газрын нэрийн өмнөөс талархал илэрхийлье. Монгол Улсын Засгийн газар үйл ажиллагааны хөтөлбөрөө хэрэгжүүлж, үр дүнд хүргэхэд та бүхний оруулж буй хувь нэмэр, хичээл зүтгэл чухал байсан” гэдгийг онцлон ажлын амжилт, хамгийн сайн сайхан бүхнийг хүссэн юм.
МОНГОЛ УЛСЫН ЗАСГИЙН ГАЗРЫН ХҮНДЭТ ӨРГӨМЖЛӨЛ ХҮРТСЭН СУРГАГЧ АХЛАГЧ Ж.ХАДБААТАРТАА БАЯР ХҮРГЭЕ