ХҮҮХЭД БҮХЭН ИНЭЭЖ БАЙГ :) :)

Нийслэлийн Цагдаагийн газраас Олон улсын хүүхдийн эрхийг хамгаалах өдрийг угтан алба хаагчид, ажилтнуудынхаа гэр бүл, хүүхдүүдэд баярын мэндчилгээ дэвшүүлэх, цагдаагийн албаны үйл ажиллагааг сурталчлах “Гэр бүлийн өдөр-хүүхдийн баяр” өдөрлөгийг өнөөдөр /2017.05.31/ зохион байгууллаа.

Тус газрын алба хаагчдын хүүхдүүдийн дунд “Бяцхан мисс” тэмцээн, гар зургийн болон баримлын шавраар бүтээл урлах уралдааныг зохион байгуулж, урлагийн тоглолт сонирхуулан нэгэн өдрийг хөгжөөнтэй өнгөрүүлсэн юм.

Нийслэлийн Цагдаагийн газрын дарга, цагдаагийн хурандаа Ж.Эрдэнэболд “Маргааш буюу Олон улсын хүүхдийн эрхийг хамгаалах өдөр манай алба хаагчид бүрэн бүрэлдэхүүнээрээ ажиллана. Тиймээс өнөөдөр хүүхдүүдээ баярлуулж аав, ээжийнх нь ажил, албатай танилцуулж байна. Алба хаагчид, ажилтнуудынхаа болон нийт хүүхэд багачууддаа Олон улсын хүүхдийн эрхийг хамгаалах өдрийн мэнд хүргэе” хэмээн мэндчилгээ дэвшүүллээ.

Хүүхэд багачуудад аав, ээжийнх нь ажлын онцлогийг харуулсан галт зэвсэг, тусгай хэрэгсэл, албаны морь, нохойт үзүүлбэр онцгой байдлын болон цагдаагийн автомашин, мотоцикль, тусгай ажиллагааны газрын “Тигр” автомашин зэргийг байршуулан үзүүлж, урлагийн тоглолтоор бэлэг барилаа.

Мөн алба хаагчдын хүүхдүүдийн дунд насны ангиллаар “Баримлын шавран бүтээл”, “Наамал, хатгамал”, “Гар зураг”-ийн уралдаан, “Бяцхан мисс”, хөвгүүдийн дунд “Хөгжөөнт буухиа” тэмцээн, эцэг, эхчүүдэд “Хүүхдийн дууг хэн сайн дуулах вэ?”, ээжүүдийн дунд “Чанга шивнээ” тэмцээнүүдийг тус тус зохион байгуулан, тэмцээнд амжилттай оролцсон эцэг, эх, хүүхдийг өргөмжлөл, мөнгөн шагнал, бэлэг дурсгалын зүйлээр урамшуулсан.

Охид дуулж, бүжиглэн авьяасаа үзүүлж “Бяцхан мисс”-ийн тайзан дээр загвар үзүүллээ. Харин хөвгүүд дугуйн уралдаанд оролцож, хүүхэд, багачууд цагдаагийн албаны тусгай хэрэгсэл, автомашинуудын үзэсгэлэнг сонирхож, морьт болон нохойт эргүүлтэй хамтдаа зургаа татуулах, онцгой байдлын албаны өргөгч кран дээрээс алсыг харах зэргээр цагийг хөгжилтэй өнгөрүүлэв.

Хүүхэд бүхэн инээж байг. :)