Цагдаагийн байгууллагад “Мэдээлэл судалгааны алба” үүсэн байгуулагдсаны 50 жилийн ойг тохиолдуулан “Гэмт хэргийн статистикийг боловсронгуй болгох төслийн хүрээнд Мэдээлэл нэгтгэн боловсруулах газраас Үндэсний статистикийн хороо, Хууль сахиулахын их сургууль, Хөдөө аж ахуйн их сургуулийн Эдийн засаг, бизнесийн сургуультай хамтран сургалт зохион байгуулав.

Сургалтанд төв орон нутгийн цагдаагийн газрын алба хаагчид оролцлоо. Цагдаагийн байгууллагын хувьд 2017 он албаны шинэ хуулиа өлгийдэн авч хэрэгжүүлж эхэлсэн, улмаар Эрүүгийн болон эрүүгийн хэрэг хянан шийдвэрлэх, зөрчлийн болон зөрчлийн хэрэг хянан шийдвэрлэх зарим хууль сахиулах үйл ажиллагааны гол хуулиуд шинэчлэгдсэн эрх зүйн шинэтгэлийн жил болж байна.

Энэ жил  “Гэмт хэрэг, зөрчлөөс урьдчилан сэргийлэх ажлын чанар, үр дүнг дээшлүүлэх” зорилт дэвшүүлэн ажиллаж байгаа. Энэ зорилтыг хэрэгжүүлэх гол түлхүүр нь та бүхний бүрдүүлж байгаа мэдээллийн сан, түүнд түшиглэн гаргаж буй статистик мэдээ, мэдээлэл, танилцуулга гэж сургалтанд оролцогчид онцоллоо.

Бүрдүүлж буй мэдээллийн сан үнэн зөв, бүрэн гүйцэт байж гэмээн гэмт хэрэг, зөрчилтэй тэмцэх, түүнээс урьдчилан сэргийлэх цагдаагийн байгууллагын бодлого зөв тодорхойлогдон энэ хэрээр бидний иргэд, төр засгийн өмнө хүлээсэн үүрэг бүрэн дүүрэн хэрэгжүүлэх боломж бололцоо бүрдэхм юм.

Оролцогчид энэхүү сургалтанд хамрагдсанаар ажил үүрэгтээ мэргэшихийн зэрэгцээ мэдээллийн сан бүрдүүлэх, хариуцсан нутаг дэвсгэрийн эрүүгийн болон хэв журмын нөхцөл байдалд дүн шинжилгээ хийх, үнэлэлт дүгнэлт өгөх, гэмт хэргээс урьдчилан сэргийлэх бодлого, арга хэмжээг зохион байгуулахад онцгой ач холбогдолтойгоос гадна статистик мэдээнд дүн шинжилгээ, судалгаа хийх, тайлан танилцуулга бэлтгэн оновчтой байдлаар илэрхийлэх мэдлэг, чадвар эзэмшиж, ажилдаа ахиц гарна.

Монгол Улсад Гэмт хэргээс урьдчилан сэргийлэх хуулийг хэрэгжүүлэх ажилд хувь нэмрээ оруулан цагдаагийн байгууллагын алба хаагчдад статистикийн анхан шатны мэдлэг олгохоор ажиллаж гэмт хэрэг, зөрчилтэй тэмцэх, урьдчилан сэргийлэх ажил гар бие оролцож буй Үндэсний статистикийн хороо, Хууль сахиулахын их сургууль, Хөдөө аж ахуйн их сургуулийн Эдийн засаг, бизнесийн сургуулийн эрдэмтэн, багш, судлаач нартаа ажлын амжилт хүсье.