100 жил
ЭМЧ НАРТ “ГЭМТ ХЭРГЭЭС УРЬДЧИЛАН СЭРГИЙЛЭХ ТУХАЙ” СУРГАЛТ ЗОХИОН БАЙГУУЛАВ
ЭМЧ НАРТ “ГЭМТ ХЭРГЭЭС УРЬДЧИЛАН СЭРГИЙЛЭХ ТУХАЙ” СУРГАЛТ ЗОХИОН БАЙГУУЛАВ
Нийслэлийн цагдаагийн газрын Халаасны хулгайн гэмт хэрэгтэй тэмцэх хэлтсээс нийслэл хотын хэмжээнд үйл ажиллагаа явуулж байгаа халаасны хулгайн гэмт хэрэг ихээр үйлдэгддэг төрийн болон төрийн бус эмнэлгийн байгууллагуудад Монгол Улсын гэмт хэргээс урьдчилан сэргийлэх хуулийн дагуу албан мэдэгдэл хүргүүлэн ажиллаж байна.
Албан мэдэгдлийн хүрээнд өнгөрөгч баасан гарагт /2017.04.28/ Гэмтэл согог судлалын үндэсний төв эмнэлгийн эмч, сувилагч, ажилтан, албан хаагч нарт тус хэлтсийн эрүүгийн төлөөлөгч, цагдаагийн дэслэгч Г.Доржбат, Баянгол дүүрэг дэх цагдаагийн хоёрдугаар хэлтсийн Урьдчилан сэргийлэх ажил хариуцсан ахлах, цагдаагийн ахмад Б.Түвшинбаяр, мөн дүүргийн 7 дугаар хорооны хэсгийн байцаагч, цагдаагийн дэслэгч Г.Эрдэнэбаяр, дүүргийн хяналтын прокурор М.Ням-Очир нар халаасны хулгайн гэмт хэрэг болон бусад төрлийн гэмт хэргээс урьдчилан сэргийлэх, Монгол Улсын гэмт хэргээс урьдчилан сэргийлэх тухай хуулийг таниулах, эмч нарын гэмт хэрэгт холбогдохгүй байх талаарх эрхзүйн мэдлэгийг дээшлүүлэх сэдвээр мэдээлэл хийлээ.
Сургалтад тус эмнэлгийн нийт 50 орчим эмч, ажилтан, алба хаагч нар хамрагдаж, санал солилцов.
Нийслэлийн цагдаагийн газрын Халаасны хулгайн гэмт хэрэгтэй тэмцэх хэлтсээс өнгөрөгч гуравдугаар сард Шастины нэрэмжит Улсын Нэгдсэн 3-р эмнэлэгт зохион байгуулж, гэмт хэргээс урьдчилан сэргийлэх чиглэлээр тус эмнэлэгтэй хамтран ажилласны үр дүнд халаасны хулгайн гэмт хэргийн гаралтыг 70 орчим хувиар бууруулсан үр дүн гарсан.
2016 онд дүүрэг дэх цагдаагийн хэлтсүүдэд эмнэлгийн байгууллагад үйлдэгдэж бүртгэгдсэн халаасны хулгайн гэмт хэргийн гомдол, мэдээлэл нийт 175 бүртгэгджээ. Энэ нь мөн онтой харьцуулбал энэ төрлийн хэрэг 18.6 хувиар буурч, гэмт хэргийн илрүүлэлт 53 хувьтай байгаа нь өмнөх оны мөн үеэс 3.4 хувиар өссөн үзүүлэлтэй байна.
Цаашид Нийслэлийн цагдаагийн газрын Халаасны хулгайн гэмт хэрэгтэй тэмцэх хэлтэс цагдаагийн байгууллагаас 2017 онд дэвшүүлсэн зорилтын хүрээнд энэ төрлийн гэмт хэрэг үйлдэгдэж байгаа төрийн болон төрийн бус эмнэлгийн байгууллагуудтай гэмт хэргээс урьдчилан сэргийлэх чиглэлээр тогтмол хамтран ажиллаж, халаасны хулгайн гэмт хэрэгтэй тэмцэх ажилд иргэдийг татан оролцуулах, гэмт хэргийн гаралтыг бууруулах талаар иргэд, аж ахуй нэгж байгууллагуудтай хамтран олон талт арга хэмжээ авч хэрэгжүүлэн ажиллаж байна.
