Замын цагдаагийн албаны дарга, цагдаагийн хурандаа Б.Даваазул: "2016 онд нэг замын цагдаагийн алба хаагчид оногдох дундаж зөрчил жилд 3119, нэг офицерт ногдох дуудлага жилд 544 байна. МУ-ын Цагдаагийн албаны тухай хуулийг энэ оны 3-р сарын 2-ны өдрөөс улс орон даяар мөрдөж эхэлсэнтэй холбогдуулан Цагдаагийн байгууллагын удирдах ажилтны зөвлөгөөн шинэчлэн батлагдсан хуулийн дагуу зохион байгуулагдаж, цагдаагийн байгууллагын бүтцийн өөрчлөлт хийгдсэн. 1992 онд Улаанбаатар хот 575,000 хүн амтай байсан бол 2017 оны байдлаар 1,311,000 хүн амтай буюу 2,2 дахин өсчээ. Харин 1992 онд хөдөлгөөнд оролцож буй тээврийн хэрэгслийн тоо 43,3 мянга байсан бол өнөөдрийн байдлаар 487,000 буюу 11,2 дахин өссөн үзүүлэлттэй байна. Замын нөхцөл байдлын хувьд 1992 онд 374 км зам байсан бол өдгөө 795 км буюу 2,5 дахин өссөн байна.

Хөдөлгөөн зохицуулах чиглэлээр Замын хөдөлгөөний аюулгүй байдлын тухай хууль, дүрмийн хэрэгжилтийн чиглэлээр ажиллаж байгаа замын цагдаагийн алба хаагчдын хувьд 1992 онд 408 алба хаагчтай үүрэг гүйцэтгэдэг байсан бол одоогийн байдлаар 572 алба хаагч үүрэг гүйцэтгэж байна.

Нийслэлийн нутаг дэвсгэрт замын цагдаагийн хяналтыг хүртээмжтэй хүргэхийн тулд 105 цэгийг хяналтанд авч, алба хаагчид өдөртөө 2 ээлжээр, шөнөдөө 18 чиглэлд 36 алба хаагч ажиллах шаардлагатай боловч одоогоор өдөрт 65 цэгт 2 ээлжээр, шөнөдөө 12 чиглэлд 24 алба хаагчийг тогтмол ажиллуулж байна" гэж мэдээллээ.

Үүнтэй холбогдуулан тус хуралдаанаар Нийслэлийн хэмжээнд тээврийн хэрэгслээр болон явганаар хөдөлгөөнд оролцогч, зорчигч-хүүхдийн аюулгүй байдлыг хангах, нас баралт, гэмтлийг бууруулах, зам тээврийн ослоос урьдчилан сэргийлэх ажлыг нэгдсэн байдлаар зохион байгуулах зорилгоор "Хариуцлага-2017" 2 сарын аяныг өнөөдрөөс эхлүүлэхээр баталлаа.