ЦЕГ-ЫН ДАРГА Ө.ЭНХТӨР “АЮУЛГҮЙ БАЙДЛЫН ТӨЛӨӨХ ЭВ НЭГДЭЛ” ОЛОН УЛСЫН ФОРУМД ОРОЛЦОЖ БАЙНА

Монгол Улсын Хууль зүй, дотоод хэргийн сайд С.Бямбацогт, Цагдаагийн ерөнхий газар, Монгол Улсын Интерполын Үндэсний төв товчооны дарга, цагдаагийн хурандаа Ө.Энхтөр нар Арабын Нэгдсэн Эмират Улсын нийслэл Абу Даби хотноо 2017 оны 03 дугаар сарын 28-наас 30-ны өдрүүдэд зохион байгуулагдаж буй “Аюулгүй байдлын төлөөх эв нэгдэл” сэдэвт олон улсын форумд оролцож байна.

Тус олон улсын Форумын үеэр ЦЕГ-ын дарга Ө.Энхтөр Олон улсын эрүүгийн цагдаагийн байгууллага-Интерполын Ерөнхий нарийн бичгийн дарга Юрген Штоктой уулзаж хамтын ажиллагааны талаар санал солилцлоо.

Энэхүү арга хэмжээний үеэр Интерполын гишүүн орнуудын дотоод хэргийн сайд, цагдаагийн байгууллагын дарга нар дэлхийн аюулгүй байдлын орчныг сайжруулахад гүйцэтгэх үүрэг, хариуцлагын талаар хэлэлцэв.

Арабын Нэгдсэн Эмират Улсаас хандивласан 50 сая еврогоор санхүүжих терроризмтой тэмцэх, кибер гэмт хэрэг, соёлын өв, нийгмийн эмзэг давхарга, тээврийн хэрэгслийн гэмт хэрэг, мансууруулах бодис, хууль бус бараа гэсэн асуудлуудтай холбоотойгоор Интерполоос хэрэгжүүлэх 7 төслийн хүрээнд хэлэлцүүлэг өрнүүлсэн байна.