“Цагдаагийн албаны тухай хууль”-ийн эх бичвэрийг хүлээн авч, Цагдаагийн ерөнхий газрын Ёслол, хүндэтгэлийн танхимд залах ёслолын ажиллагаа өнөөдөр боллоо.

1993, 2013 онд баталсан Цагдаагийн албаны тухай хуулийг энэ оны хоёрдугаар сарын 9-ний өдрийн УИХ-ын чуулганы нэгдсэн хуралдаанаар шинэчлэн баталсан юм.  Цагдаагийн ерөнхий газрын дарга, цагдаагийн хурандаа Ө.Энхтөр ёслолын ажиллагааг нээж “Цагдаагийн байгууллагын бие бүрэлдэхүүн бид шинэчлэн батлагдсан Цагдаагийн албаны тухай хуулиа чанд мөрдөж ард түмнийхээ эрх, эрх чөлөөг хүндэтгэн, гэмт хэргээс урьдчилан сэргийлэх, нийтийн хэв журам хамгаалах, олон нийтийн аюулгүй байдлыг хангах үүргээ нэр төртэйгөөр биелүүлж, хууль зөрчсөн үйлдэл бүрт хуулийн дагуу хариуцлага тооцож ажиллана. Монгол төрийн цагдаагийн суу алдар, сүр хүч, сүлд хийморь мандан бадрах болтугай” хэмээн хэллээ.

Хууль зүй, дотоод хэргийн сайд С.Бямбацогт “Хууль тогтоомжийн тухай Монгол улсын  хуулийг хэрэгжүүлэх хүрээнд шинээр батлагдан гарч буй хуулийн эхийг уг хуулийг гардан хэрэгжүүлэгч нарт  гардуулан өгч нийт олны хүртээл болгох нэг мөр хэрэгжүүлэх ажлыг эхлүүлдэг сайн жишиг тогтож байгаа юм.  Монгол түмэн ардын цагдаадаа итгэж , Монгол улс төрийн цаглдаагаа дэмжин түшиж ирсэн ариун уламжлал цагийн  эрхэнд алдрах учиргүй. Төрийн түшиг, түмний өмөг болсон цагдаагийн байгууллагынхаа нийт бие бүрэлдэхүүнд аз хийморь, цог залийг эрхэмлэн ерөөе” гэв.

Цагдаагийн албаны тухай хуулийн эх бичвэрийг хүлээн авах ёслолын ажиллагааны үеэр цагдаагийн алба хаагчийн шинэ тангараг өргөх ёслол, цагдаагийн байгууллагын алба хаагчдын ёслолын жагсаал боллоо. Эрүүгийн цагдаагийн алба, Мөрдөн байцаах алба, Замын цагдаагийн алба, Хууль сахиулахын их сургууль, Тусгай ажиллагааны газар, Нийслэлийн цагдаагийн газар, Баянгол дүүрэг дэх цагдаагийн нэг, хоёрдугаар хэлтэс зэрэг Улаанбаатар цагдаагийн хүрээний алба хаагчид ёслолын жагсаалд оролцов.

Хуулийн эх бичвэрийг гардуулан өгөх ёслолын ажиллагаанд Монгол Улсын Их хурлын дарга М.Энхболд, Монгол Улсын Их хурлын дэд дарга Ц.Нямдорж, Монгол Улсын Ерөнхий сайд Ж.Эрдэнэбат, Монгол Улсын сайд, Засгийн газрын хэрэг эрхлэх газрын дарга Ж.Мөнхбат, Монгол Улсын Их хурлын гишүүн, Хууль зүйн байнгын хорооны дарга Ш.Раднаасэд, Монгол Улсын Их хурлын гишүүн, Монгол Улсын Их хурлын Тамгын газрын Ерөнхий нарийн бичгийн дарга   Ц.Цолмон, Хууль зүй, дотоод хэргийн дэд сайд Б.Энхбаяр,  Хууль зүй, дотоод хэргийн яамны Төрийн нарийн бичгийн дарга Г.Баясгалан, Нийслэлийн Засаг дарга бөгөөд Улаанбаатар хотын захирагч С.Батболд, Цагдаагийн ерөнхий газрын даргаар ажиллаж байсан хошууч генерал Б.Пүрэв, Цагдаагийн ерөнхий газрын даргаар  ажиллаж байсан хошууч генерал Д.Сандаг-Очир, Цагдаагийн ерөнхий газрын даргаар ажиллаж байсан хошууч генерал С.Дамдинсүрэн, Цагдаагийн ерөнхий газрын даргаар ажиллаж байсан хошууч генерал Ч.Амарболд, Цагдаагийн ерөнхий газрын тэргүүн дэд дарга, цагдаагийн хурандаа П.Батбаатар, Цагдаагийн байгууллагын ахмадын холбооны тэргүүн, цагдаагийн бэлтгэл хурандаа Н.Гаравсүрэн, Замын цагдаагийн албаны жижүүрийн цагдаа, цагдаагийн ахлах ахлагч Ц.Бат-Эрдэнэ нарын Монгол Улсын Их хурал, Засгийн газар, Улсын Их Хурлын байнгын хороод, Засгийн газрын Хэрэг эрхлэх газар, Хууль зүй, дотоод хэргийн яам, бусад агентлаг, Цагдаагийн ерөнхий газрын үе үеийн удирдлага, Улаанбаатар хотын удирдлага, Цагдаагийн байгууллага, бусад байгууллагын төлөөлөл урилгаар оролцлоо.  

Цагдаагийн ерөнхий газрын дарга асан, хошууч генерал Б.Пүрэв “Олноо өргөгдсөний зургаадугаар оны сүүлчийн өдөр анхны төрөлжсөн дүрмээ Богд хаанаар батлуулж байсан Монголын цагдаа өнөөдөр Цагдаагийн албаны тухай хуулийн эх бичвэрээ хүлээн авч байна. Энэ хууль бол цагдаагийн байгууллагын үйл ажиллагаа, эрх зүйн байдлыг цогц зохицуулсан түүхэндээ хамгийн тодорхой хууль болсон. Энэхүү хуулийг баталж өгсөн ХЗДХЯ, УИХ-ын эрхэм гишүүд, ялангуяа Хууль зүйн байнгын хорооныхонд баярлаж буйгаа илэрхийлье” гэлээ.