БАЯНЗҮРХ ДҮҮРГИЙН ЦАГДААГИЙН 1-Р ХЭЛТЭС ОРЧИН ҮЕИЙН ЖИШИГТ НИЙЦСЭН ИРГЭДИЙН ХҮЛЭЭЛГИЙН ӨРӨӨТЭЙ БОЛЛОО

Өөдлөх айл үүднээсээ гэдэг. Баянзүрх дүүргийн цагдаагийн 1-р хэлтсийн алба хаагчид иргэдэд чиглэсэн олон арван шинэлэг ажлуудыг зохион байгуулсаар ирсэн. Энэ удаа тус хэлтсийн алба хаагчдын санаачлагаар дотоод нөөц бололцоондоо тулгуурлан иргэдийн хүлээлгийн өрөөг тохижуулж нээлтээ хийлээ.

Энэхүү өрөөнд тус цагдаагийн хэлтэст хандан өргөдөл гомдол өгч шалгуулж байгаа болон гэмт хэрэгт сэжигтнээр байцаагдаж үйлчлүүлж байгаа иргэдийнхээ тохь тухтай, түргэн шуурхай байдлыг хангах чиглэлээр цэвэр ус уух боломж, гар утасны цэнэглэгч хайрцаг, бичгийн хэрэгсэл, ширээ, сандал, цагдаагийн байгууллагын үйл ажиллагааг сурталчилсан гарын авлага, эрх зүйн мэдлэг олгох зурагт хуудас, сэтгүүл байрлуулжээ. Иргэд энэ үйл явдалд талархалтай байна.

Улаанбаатар хотын хамгийн олон хүн амтайд тооцогддог Баянзүрх дүүрэг дэх цагдаагийн 1-р хэлтэс нь энэ жил түүхт 65 жилийн ойтойгоо золгож байгаа. Тиймээс тус хэлтсээс ойгоо угтан өөрсдийн санаачлага, санхүүжилтээр шат дараалсан бүтээн байгуулалт, тохижилтын ажлуудыг эхлүүлээд байгаа юм.

Цаашид мөн иргэдэд төдийгүй алба хаагчидад чиглэсэн олон арван бүтээлч ажлуудыг хийхээр төлөвлөжээ.Нээлтийн үйл ажиллагаанд Улаанбаатар хотын цагдааийн газрын дэд дарга К.Нямдаваа, тус дүүргийн Засаг дарга Д. Пүрэвдаваа, Баянзүрх дүүргийн цагдаагийн 2-р хэлтсийн дарга, цагдаагийн хурандаа Т.Дамбийням алба хаагчдын болон иргэдийн төлөөлөл оролцсон юм. Баян-зүрх дүүргийн цагдаагийн 1-р хэлтсийн алба хаагчдынхаа цааш цаашдын бүтээн байгуулалтын ажилд амжилт хүсье. Амны билгээс ашдын билэг гэдэг дээ. Цагдаагийн байгууллага бүхэн иргэдийнхээ тав тухыг хангасан  тохилог хүлээлгийн өрөөтэй болох болтугай.