ГЭРЭЭТ ХАРУУЛ ХАМГААЛТЫН БҮРТГЭЛИЙН /SAS/ ПРОГРАМ ХАНГАМЖИЙГ ХҮЛЭЭЛГЭН ӨГӨВ.

Гэрээт харуул хамгаалалтын тухай хуулийн 5 дугаар зүйлийн 1, 7 дугаар зүйлд заасан журмын дагуу “..Хуулийн этгээдийн улсын бүртгэлд бүртгэлтэй хуулийн этгээд нь харуул хамгаалалтын үйл ажиллагаа эрхлэхдээ харьяалах аймаг, нийслэлийн цагдаагийн газар /хэлтэс/-т бүртгүүлснээр үйл ажиллагаа явуулах эрхтэй болдог.

Энэхүү бүртгэлийг болон харуул хамгаалалтын үйл ажиллагаа эрхлэгч аж ахуйн нэгжийн хагас жил, бүтэн жилийн үйл ажиллагааны тайлан, судалгааг цаасан хэлбэрээр хүлээн авдаг, нутаг дэвсгэр үйл ажиллагаа явуулж байгаа аж ахуйн нэгжүүдийн бүртгэл судалгаа хангалтгүй, үйл ажиллагаанд нь нэгдсэн журмаар хяналт тавих боломжгүй байлаа.
Иймд гэрээт харуул хамгаалалтын үйл ажиллагаа эрхэлж байгаа этгээдүүдийн мэдээллийн нэгдсэн санг бүрдүүлэх, үйл ажиллагаанд нь тавих хяналтыг дээшлүүлэх, хуулийн этгээдээс үйл ажиллагааны тайлан, бусад судалгааг цахим хэлбэрээр гаргах боломжтой мэдээллийн системийг ЦЕГ-ын Мэдээлэл, технологийн төвөөс өөрийн дотоод нөөц бололцоонд тулгуурлан боловсруулж ЦЕГ-ын Нийтийн хэв журам хамгаалах газар, Лицензийн төв, Улаанбаатар хотын цагдаагийн газрын нийтийн хэв журам хамгаалах хэлтэст хүлээлгэн өглөө.

Хүлээлгэн өгөх ажилд Нийтийн хэв журам хамгаалах газрын дарга, туслах комиссар Б.Ганзориг, Мэдээлэл, технологийн төвийн дарга, цагдаагийн хурандаа Х.Энхжаргал, Лицензийн төвийн дарга , цагдаагийн хурандаа Г.Эрдэнэцацрал, Улаанбаатар хотын цагдаагийн газрын Нийтийн хэв журам хамгаалах асуудал эрхэлсэн дэд дарга, цагдаагийн дэд хурандаа И.Баттөгс, мөн газрын Нийтийн хэв журам хамгаалах газрын хэлтсийн дарга, цагдаагийн дэд хурандаа Ц.Цэрэнпунцаг болон албаны бусад хүмүүс оролцов.