Америкийн нэгдсэн улсын Хар тамхитай тэмцэх албаны  БНХАУ-ын Бээжин хотын төлөөлөгчийн газрын атташе Майкал Пуллен Монгол улсад албан томилолтоор айлчиллаа. Энэ үеэр ЦЕГ-ын Гадаад харилцааны хэлтсийн дарга, цагдаагийн хурандаа Г.Бадарч, Эрүүгийн цагдаагийн газрын дарга, цагдаагийн хурандаа Б.Буянтөр, Хар тамхитай тэмцэх хэлтсийн тасгийн дарга, цагдаагийн хошууч Б.Доржзаяа, ахлах мөрдөн байцаагч, цагдаагийн ахлах дэслэгч Б.Эрдэнэдалай нартай албан уулзалт зохион байгуулж цаашид хар тамхи, мансууруулах бодистой холбоотой гэмт хэрэгтэй тэмцэх чиглэлээр сургалт зохион байгуулах, шинэ төрлийн сэтгэцэд нөлөөт бодисын талаар мэдээллийг солилцож байх, мэдээллийн цахим сантай болоход туслах, оргон зайлсан гэмт этгээдийг эрэн сурвалжлах зэрэг шаардлагатай бүхий л тохиолдолд хамтран ажиллах хүсэлтэй байгаа илэрхийлэв. 

Америкийн нэгдсэн улсын Хар тамхитай тэмцэх алба нь  дэлхий нийтэд хар тамхи, мансууруулах болон сэтгэцэд нөлөөт бодистой тэмцэх асуудалтай манлайлан ажилладаг бөгөөд нийт 189 оронд тус улсын элчин сайдын яамдаа  түшиглэсэн төлөөлөгчийн газартай.

Уг алба нь АНУ-д хар тамхи мансууруулах сэтгэцэд нөлөөт бодистой холбоотой гэмт хэрэгтэй тэмцэх, улс орнуудын нөхцөл байдлын судалгаа, улс, үндэстэн дамнасан гэмт бүлэглэл, түүний гишүүдийн талаархи мэдээ, мэдээллийг олж баримтжуулах, эрэн сурвалжлах, шинэ төрлийн сэтгэцэд нөлөөт бодисыг илрүүлэх, хар тамхитай тэмцэх чиглэлээр ажилладаг алба хаагчдыг сургах, мэргэшүүлэх чиглэлээр үйл ажиллагаа явуулдаг юм.