ЦАГДААГИЙН ЕРӨНХИЙ ГАЗРЫН ГАДААД ХАРИЛЦААНЫ ХЭЛТСЭЭС МЭДЭЭЛЖ БАЙНА

БНХАУ-ын ӨМӨЗО-ны Нийгмийг аюулаас хамгаалах тэнхимийн урилгаар ЦЕГ-ын Гадаад харилцааны хэлтсийн дарга, цагдаагийн хурандаа Г.Бадарч, тэргүүтэй төлөөлөгчид 2016 оны 3 дугаар сарын 7-11-ний өдрүүдэд БНХАУ-ын Хөх хотод ажиллаад ирлээ.

Төлөөлөгчид тус тэнхимийн Олон улсын цагдаагийн хамтын ажиллагааны газар, Соён гэгээрүүлэх хэлтэс, Дотоод хяналтын хэлтэс, Албаны нохойн сургалтын төвийн үйл ажиллагаатай танилцаж, удирдах дарга нартай уулзаж цаашдын харилцаа хамтын ажиллагааны талаар хэлэлцэн санал солилцсон юм.

Уулзалтын үеэр хоёр тал цаашид харилцаа хамтын ажиллагааг улам эрчимжүүлэн ажиллахаар харилцан тохиролцож, 2016 онд Монголын цагдаагийн байгууллагын алба хаагч нарт зориулан эмх замбараагүй үеийн цагдаагийн байгууллагын менежмент, өндөр түвшиний албан тушаалтан оролцсон олон улсын арга хэмжээний аюулгүй байдал, албаны нохойн сургалт зэрэг сэдвээр сургалт, террор үйлдлийг таслан зогсоох сэдвээр хамтарсан дадлага-сургалт зохион байгуулахаар боллоо гэж Цагдаагийн Ерөнхий газрын гадаад харилцааны хэлтсээс мэдээллээ.