ЦАГДААГИЙН АЛБА ХААГЧИД ТӨРИЙН ДЭЭД ОДОН МЕДАЛЬ, ЦАГДААГИЙН ЕРӨНХИЙ ГАЗРЫН ШАГНАЛААР ШАГНАГДЛАА

Монгол Улсын Ерөнхийлөгчийн Зарлигаар Монгол Улс Үндэсний эрх чөлөө, тусгаар тогтнолоо сэргээн тогтоосны 103 жил, Нийслэл хотын 375 жил, Ардчилсан хөдөлгөөний 25 жилийн ойг тус тус тохиолдуулан төр захиргаа хууль эрх зүйн байгууллагад олон жил үр бүтээлтэй ажилласан алба хаагчид Монгол Улсын Төрийн дээд одон медалиар шагнагдлаа.

Мөн Цагдаагийн ерөнхий газрын даргын тушаалаар хөдөлмөрийн тэргүүний болон ажил мэргэжлийн шилдэг, оны онцлох алба хаагчдыг шагнасан юм. Шагналыг Улаанбаатар хотын цагдаагийн газрын хурлын танхимд гардууллаа.
Цэргийн гавьяаны улаан тугийн одонгоор ЦЕГ-ын тэргүүн дэд дарга, Тэргүүнд дэд комиссар Ж.Ганбаатар, Сонгинохайрхан дүүрэг дэх цагдаагийн 3-р хэлтсийн дарга, цагдаагийн хурандаа Г.Эрхэмбаяр, Сонгинохайрхан дүүрэг дэх цагдаагийн 2-р хэлтсийн гэмт хэрэгтэй тэмцэх тасгийн эрүүгийн ахлах төлөөлөгч цагдаагийн хошууч Б.Аадарсүх, ЦЕГ-ыэ ОНАБХГ-ын хамгаалалтын 1-р газрын тусгай хамгаалалтын хэсгийн дарга,цагдаагийн хошууч М.Батхуяг нар шагнагдлаа. "Цэргийн хүндэт медаль"-иар ЦЕГ-ын ДХАБГ-ын Хяналт шалгалтын хэлтсийн дарга цагдаагийн хурандаа Х.Эрдэнэбаяр, Улаанбаатар хотын цагдаагийн газрын Албадан саатуулах, баривчилах төвийн дарга цагдаагийн дэд хурандаа Ж.Алтангэрэл, Лицензийн төвийн дэд дарга, цагдаагийн дэд хурандаа П.Эрдэнэбат нарын 21 алба хаагч шагнагдлаа. "Шудрага журам" медалиар Улаанбаатар хотын цагдаагийн газрын Замын Цагдаагийн газрын Замын хөдөлгөөн зохицуулах гэрээт хэлтсийн 2-р тасгийн хөдөлгөөний аюулгүй байдал хариуцсан зохицуулагч, цагдаагийн ахмад Г.Баяржаргал шагнагдсан юм.

Энэ үеэр ЦЕГ-ын дарга Тэргүүн комиссар Р.Чингисийн алба хаагч нартаа хандаж хэлсэн үгийг бүрэн эхээр нь та бүхэндээ хүргэж байна.
Эрхэм хүндэт офицер, ахлагч Та бүхний энэ өдрийн амрыг эрж мэндчилье.
Улиран өнгөрч буй оны төгсгөл, шинэ оны босгон дээр аливаа байгууллага хийж бүтээсэн ажлаа дүгнэж, тэргүүний алба хаагчдаа шалгаруулж, шагнаж урамшуулдаг уламжлалтай.
Өнөөдөр бид эрхэлсэн ажилдаа идэвх зүтгэл, үр бүтээл гарган хамт олноо манлайлан ажилласан 7 алба хаагчийг Цагдаагийн ерөнхий газрын “Хөдөлмөрийн аварга”-аар, 12 алба хаагчийг “Ажил мэргэжлийн шилдэг алба хаагч”-аар, 7 алба хаагчийг “Оны онцлох алба хаагч”-аар тус тус шалгаруулж, шагналыг гардууллаа.
Түүнчлэн Үндэсний эрх чөлөө, тусгаар тогтнолоо сэргээн тогтоосны 103 жилийн ойг тохиолдуулан Монгол Улсын Ерөнхийлөгчийн зарлигаар хууль зүйн салбарт олон жил үр бүтээлтэй ажилласан цагдаагийн байгууллагын нийт 57 алба хаагч, ажилтанг төрийн одон, медалиар, мөн Хууль зүйн сайд болон Цагдаагийн ерөнхий газрын даргын тушаалаар зарим алба хаагчдыг шагнаж, урамшууллаа.
Цагдаагийн байгууллагаас дэвшүүлсэн зорилтыг ханган биелүүлэхэд хамт олноо хошуучлан ажиллаж, шагнагдсан Та бүхэнд Цагдаагийн ерөнхий газрын даргын зөвлөлийн нэрийн өмнөөс болон хувиасаа чин сэтгэлийн баяр хүргэж, ажлын амжилт хүсье.
Та бүхнийг ажлын ололт, амжилтаа бататган, ирж буй 2015 ондоо ард иргэдээ амар амгалан байлгах үйлсэд хүч хөдөлмөрөө дайчлан ажиллана гэдэгт итгэл төгс байна.
Цагдаагийн байгууллагын нийт бие бүрэлдэхүүнд болон та бүхний гэр бүлийнхэнд шинэ ондоо аз жаргал, баяр хөөр, амжилт бүтээлээр дүүрэн байхын өлзийтэй ерөөлийг дэвшүүлье.
Цагдаагийн байгууллагын өлмий бат, мэлмий тунгалаг байх болтугай.