Өнөөдрийн сэдэв: "Тендер авч өгнө"...баярлалаа

2014-10-27
Өнөөдрийн сэдэв:

Иргэд аж ахуй нэгж байгууллагууд ийм зарын дагуу үйлчлүүлээд тендерийг нь аваад баярлалаа гэж хэлээд зогсож байгаа мэт хөнгөн хуумгай хандаж эцэст нь хохирч байна. Хуурамч зарын цаана хууль бус ажиллагаа байдаг тухай бидэнд багагүй сургамж үлдсэн. Гадаадад суралцуулна, ажилд зуучлана гээд амиараан дэнчин тавих нь шахам ноцтой үйлдлийн золиос болдог олон жишээг бид мэднэ. Одоо эд хөрөнгө, бүтээн байгуулсан баялагаараа хохирох, бие биенээ хуурах, залилах цөөнгүй тохиолдлууд бүртгэгдээд байна.

Нийслэлийн худалдан авах ажиллагааны газрын нэрийг барьж "тендэр авч өгнө", "зуучлана" гэж иргэд компаниудыг хууран мэхлэх, их хэмжээний мөнгө залилан авах оролдлого хийсэн нь баримтаар нотлогдож цагдаагийн байгууллагууд бүртгэгдээд байгаа юм.

Хэн нь хэн болохоо мэдэхгүй, ямар байгууллагаар, ямар хүнээр үйлчлүүлж байгаагаа сайн судлахгүй зүгээр л "Тендер авч өгнө", "Зуучлана" гэсэн хоёрхон үгэнд итгээд хоосон хоцроод байгаад иргэд аж ахуй нэгж байгууллагууд өнгөрсөн борооны хойноос цув нөмрөх гэгч л болоод байна.

Төр захиргааны байгууллагын алба хаагчдын нэрийг барьж залилан хийдэг тухай цагдаагийн байгууллагаас удаа дараа сэрэмжлүүлэг хүргэж байсан. Өөрт тохиолдоогүй л бол ойшоохгүй явсаар байгаад нэг мэдэхэд өөрөө залилангийн гэмт хэргийн хохирогч болох явдал гарч байна.

Иймээс иргэд та бүхэн энэ төрлийн зараар үйлчлүүлэхгүй байж, хуулийн дагуу үйл ажиллагаанд оролцохыг цагдаагийн байгууллагын өнөөдрийн сэдвээрээ онцлон хүргэлээ. Та яг одоо ТЕНДЕР-ийн материал бүрдүүлж явна уу. Заавал нягтлаарай. Баярлалаа гэж хэлж амжилгүй балрахаас сэргийлээрэй.