Монгол Улсын Ерөнхийлөгчийн зарлигаар “Монгол Улсын Гавьяат хуульч” цол, тэмдгээр шагнагдсан Цагдаагийн ерөнхий газрын Зөвшөөрөл, үйлчилгээний төвийн дарга, цагдаагийн хурандаа Д.Наранбаатарт хүндэтгэл үзүүллээ.

Монгол Улсын Гавьяат хуульч, цагдаагийн хурандаа Д.Наранбаатар нь 1995 оноос эхлэн Цагдаа болон Авлигатай тэмцэх байгууллагад мөрдөн байцаагч, ахлах мөрдөн байцаагч, тасаг, хэлтэс, газар, албаны даргаар 32 дахь жилдээ ажиллаж байгаа юм.

Тэрээр төрийн өмч, иргэдийн амь нас, эрүүл мэнд, эд хөрөнгөд онц ноцтой хохирол учруулсан олон арван ээдрээ төвөгтэй гэмт хэргийг мөрдөж, ажлын хэсэг ахалж, мөрдөн шалгах ажиллагааг удирдан зохион байгуулж, мэргэжлийн удирдлагаар ханган шүүхээр эцэслэн шийдвэрлүүлж, мөрдөх байгууллагыг бэхжүүлэх, мөрдөгчдийн эрх зүйн байдал, ажлын чанар, үр дүнг нэмэгдүүлэх чиглэлээр олон ажил санаачлан удирдан зохион байгуулсан.

Монгол Улсын Гавьяат хуульч, цагдаагийн хурандаа Д.Наранбаатарын хариуцан ажиллаж буй Зөвшөөрөл, үйлчилгээний төвөөс хууль тогтоомжийн хүрээнд олгогдож байгаа 13 төрлийн зөвшөөрөлд хамаарах 38 үйлчилгээг 2021 оноос үе шаттайгаар “E-Mongolia” төрийн үйлчилгээний нэгдсэн системд оруулж, бүрэн цахимжуулж үнэтэй хувь нэмрээ оруулсан билээ.

Эрхэм Танд халуун баяр хүргэж, ажлын амжилт хүсье.