Монгол Улсад орчин цагийн цагдаагийн байгууллага үүсэж хөгжсөний 105 жил, Нийслэлийн Цагдаагийн удирдах газар байгуулагдсаны 100 жилийн ойг тохиолдуулан Чингэлтэй дүүргийн Цагдаагийн газраас нийслэлийн цагдаагийн харьяа дүүргүүдийн цагдаагийн газар, хэлтсүүдийн алба хаагчдын дунд “Police Cup-2026” уулын дугуйн аварга шалгаруулах тэмцээнийг /2026.06.30/ өдөр амжилттай зохион байгууллаа.

Тэмцээний нээлтийн ажиллагаанд Нийслэлийн Цагдаагийн удирдах газрын дарга, Монгол Улсын Гавьяат хуульч, цагдаагийн хурандаа Г.Арсланхуяг оролцож, тэмцээнийг албан ёсоор нээн, нийт оролцогч алба хаагчдад амжилт хүсэн үг хэлэв.

Энэхүү тэмцээн нь нийтийн биеийн тамир, спортыг хөгжүүлэх, алба хаагчдын эрүүл мэндийг дэмжих, бие бялдрыг чийрэгжүүлэх, эрүүл зөв амьдралын хэв маягийг төлөвшүүлэх, уулын дугуйн спортыг сурталчлан таниулах, мөн удирдах ажилтнуудын манлайллыг нэмэгдүүлэх зорилготой юм.

Тэмцээнд Цагдаа, дотоодын цэргийн 17 нэгжийн 250 гаруй алба хаагч оролцож, 6 насны ангилалд хурд хүч, авхаалж самбаа, ур чадвараа сорин өрсөлдсөнөөс багийн нийлбэр дүнгээр:

- Тэргүүн байр – Хан-Уул дүүргийн Цагдаагийн газрын Хоёрдугаар хэлтэс

- Дэд байр – Чингэлтэй дүүргийн Цагдаагийн газар

- Гутгаар байр – Нийслэлийн Цагдаагийн удирдах газар

Шилдэг тамирчнаар Хан-Уул дүүргийн Цагдаагийн газрын Хоёрдугаар хэлтсийн хэсгийн байцаагч, цагдаагийн дэслэгч О.Баярмаа шалгарлаа.

Тус тэмцээн нь алба хаагчдын бие бялдрын бэлтгэл, хамтын ажиллагаа, спортын нөхөрсөг өрсөлдөөнийг дэмжсэн, цагдаагийн байгууллагын ойг угтсан онцлох арга хэмжээ болж өндөрлөлөө.