Дэлхий даяар тархаж, олон нийтэд түгшүүр төрүүлээд байгаа "Эбола вируст болон бусад шинээр бүртгэгдэж байгаа халдварыг болзошгүй аюулаас урьдчилан сэргийлэх, бэлэн байдлыг хангах тухай" Үндэсний аюулгүй байдлын зөвлөлийн 2014-09-01 ний өдрийн 45/25 дугаар зөвлөмжийн дагуу цаашид анхаарч, хэрэгжүүлэх асуудлаар цагдаагийн байгууллага нийт алба хаагчдадаа мэргэжлийн байгууллагатай хамтран энэхүү өвчнөөс урьдчилан сэргийлэх талаар мэдээлэл хүргэлээ.

Энэхүү вирус нь анх 1976 онд Судан улс болон Конго улсын "Ямбуку" гэдэг хоёр сууринд нэгэн зэрэг дэгджээ. Дээрх өвчний шинж тэмдэг илрэх нууц халдвар авснаас 2-21 хоног үргэлжилж, гэнэт өндөр халуурч, бие сульдах, булчин толгой хоолой эмзэглэлтэй болж өвдөх зэрэг шинж тэмдгүүд илэрч, бөөлжих, суулгах, тууралт гарах зэрэг шинж тэмдгүүд нэмэгддэг байна.

Түүнчлэн хүнд болон амь насанд аюултай үедээ цусархаг диатез илэрч, элэгний болон бөөрний дутагдал, төв мэдрэлийн системийн өөрчлөлт, олон эрхтэн системийг хамарсан хүндрэлд хүргэж, лабораторийн шинжилгээгээр цусны цагаан эс, тромбоцитийн тоо цөөрч,элэгний ферментүүдийн хэмжээ ихсэх байдлаар илэрдэг байна