Монгол Улсын Засгийн газраас 2023–2028 оныг “Монголд зочлох жил” болгон зарласантай холбогдуулан гадаадын жуулчдын аюулгүй байдлыг хангах, гэмт хэрэг, зөрчлөөс урьдчилан сэргийлэх, шаардлагатай мэдээ, мэдээлэл, зөвлөгөө өгөх зорилготой “Оюутан цагдаа-2026” хөтөлбөрийг өнөөдөр /2026.06.26/ албан ёсоор эхлүүллээ.

Тус хөтөлбөрийг Нийслэлийн Гэмт хэргээс урьдчилан сэргийлэх ажлыг зохицуулах салбар зөвлөл, Нийслэлийн цагдаагийн удирдах газар, Нийслэлийн Аялал жуулчлалын газар, Монголын оюутны холбоо хамтран зохион байгуулж байгаа бөгөөд хоёр сарын хугацаанд хэрэгжүүлэх юм.

Хөтөлбөрийн хүрээнд сонгон шалгаруулалтад тэнцсэн оюутнууд нийслэлийн аялал жуулчлалын бүс, жуулчид олноор зорчдог гудамж, талбай, түүх, соёлын дурсгалт газруудад үүрэг гүйцэтгэж, гадаадын иргэд, жуулчдад шаардлагатай мэдээлэл, зөвлөгөө өгөхөөс гадна гэмт хэрэг, зөрчлөөс урьдчилан сэргийлэх чиглэлээр ажиллана. Мөн шаардлагатай тохиолдолд цагдаагийн байгууллагатай хамтран ажиллаж, иргэд, жуулчдын аюулгүй байдлыг хангахад дэмжлэг үзүүлэх юм.

Нээлтийн арга хэмжээнд Нийслэлийн Иргэдийн Төлөөлөгчдийн Хурлын төлөөлөгч, Засаглал, эрх зүйн хорооны дарга Б.Сэмжидмаа, Нийслэлийн цагдаагийн удирдах газрын Нийтийн хэв журам хамгаалах, олон нийтийн аюулгүй байдлыг хангах газрын дарга, цагдаагийн хурандаа С.Булгантамир, Нийслэлийн Аялал жуулчлалын газрын Мэдээлэл, сурталчилгааны хэлтсийн дарга Б.Алтанзаяа, Монголын Оюутны холбооны дэд ерөнхийлөгч Э.Дөлгөөн болон холбогдох байгууллагын төлөөлөл оролцож, хөтөлбөрт хамрагдаж буй оюутан залууст баяр хүргэн, ажлын амжилт хүслээ.

“Оюутан цагдаа” хөтөлбөр нь аялал жуулчлалын оргил улиралд гадаадын иргэд, жуулчдад ээлтэй, аюулгүй орчин бүрдүүлэх, Монгол Улсын аялал жуулчлалын үйлчилгээний чанар, хүртээмжийг нэмэгдүүлэхэд бодит хувь нэмэр оруулж, цагдаагийн байгууллага, төрийн болон төрийн бус байгууллагын хамтын ажиллагааг бэхжүүлэх ач холбогдолтой юм.