Олон улсын эрүүгийн цагдаагийн байгууллага-Интерполоос Морокко Улсын Марракеш хотноо зохион байгуулсан “Дижитал аюулгүй байдлын сорилго” олон улсын тэмцээнд Кибер гэмт хэрэгтэй тэмцэх газрын шинжээч-эрүүгийн ахлах мөрдөгч, цагдаагийн ахмад Э.Пүрэв-Очир оролцож, алтан медаль хүртлээ.

Дээрх тэмцээн нь дэлхийн улс орнуудын кибер аюулгүй байдал, цахим орчин дахь гэмт хэрэгтэй тэмцэх чиглэлээр ажилладаг шилдэг мэргэжилтнүүд, ёс зүйт хакеруудын мэдлэг, ур чадвар, шуурхай сэтгэлгээ, техник технологийн чадамжийг сорьдог өндөр түвшний олон улсын тэмцээн юм.

Цагдаагийн ахмад Э.Пүрэв-Очир тэмцээний үеэр дижитал мөрдөн шалгах ажиллагаа, кибер халдлагын илрүүлэлт, цахим нотлох баримтын шинжилгээ зэрэг төрлүүдэд өндөр ур чадвар гарган оролцож, олон улсын шилдэг мэргэжилтнүүдтэй нэг баг болон өрсөлдөн, багаараа тэргүүн байр эзлэв.

Энэ удаагийн тэмцээнд Монгол Улсаас нийт зургаан алба хаагч оролцсон бөгөөд оролцогчид бүгд мэргэжлийн өндөр түвшинд өрсөлдөж, Монголын цагдаагийн байгууллагын кибер аюулгүй байдлын чадавх, боловсон хүчний ур чадварыг олон улсын тавцанд харуулсан юм.

Цахим орчин дахь гэмт хэрэг, кибер халдлагын арга хэлбэр улам нарийсаж буй өнөө үед Монгол Улсын цагдаагийн байгууллагын алба хаагчид дэлхийн хэмжээний мэргэжилтнүүдтэй эн зэрэгцэн өрсөлдөж, өндөр амжилт гаргаж буй нь салбарын хүний нөөц, техник технологи, мэдлэг ур чадвар олон улсын түвшинд хүрснийг харуулсан онцлох үйл явдал боллоо.

Эх орныхоо нэрийг олон улсын тавцанд өндөрт өргөсөн нийт алба хаагчдадаа баяр хүргэж, цаашдын ажил үйлсэд нь өндөр амжилт хүсье.