Цагдаагийн байгууллага анх удаа полиграфийн мэргэжилтнүүдийг дотооддоо бэлтгэн сургаж, мэргэжлийн чадавхыг бий болголоо.

Сургалтад 15 алба хаагч хамрагдан гурван сарын хугацаанд мэргэшсэн, стандартын шаардлага хангасан, эрх бүхий полиграфийн мэргэжилтэн болж төгслөө.

Полиграфийн мэргэжилтэн бэлтгэснээр гэмт хэрэгтэй тэмцэх, байгууллагын хүний нөөцийн сонгон шалгаруулалтыг боловсронгуй болгох, дотоод хяналт, аюулгүй байдлыг бэхжүүлэх, эрсдэлийг тодорхойлох зэрэг үйл ажиллагаанд олон улсын жишиг, орчин үеийн технологийг нэвтрүүлэх нөхцөл бүрдэж байгаагаараа онцлог билээ.

Мөн төрийн тусгай албанд ажиллах хүний нөөцийн найдвартай байдлыг үнэлэх, алба хаагчдын сахилга, ёс зүй, үнэнч байдлыг баталгаажуулах, авлига болон ашиг сонирхлын зөрчилтэй холбоотой эрсдэлийг бууруулах, гэмт хэрэгтэй тэмцэх ажиллагаанд дэмжлэг үзүүлэхээс гадна хүний эрхийг хамгаалах чиглэлд чухал хувь нэмэр оруулах ач холбогдолтой.

Полиграфийн төхөөрөмжийг дэлхийн олон улс оронд гэмт хэрэг илрүүлэх, хүний нөөцийн сонгон шалгаруулалт хийх, байгууллагын дотоод аюулгүй байдлыг хангах, авлига болон ашиг сонирхлын зөрчилтэй холбоотой эрсдэлийг бууруулахад өргөнөөр ашигладаг бөгөөд цагдаагийн байгууллага энэ чиглэлээр дотоодын мэргэжлийн боловсон хүчнээ бэлтгэж эхэлсэн нь байгууллагын цаашдын үйл ажиллагаанд эерэг нөлөөтэй юм.