Хууль зүйн яамнаас баталсан “Гэмт хэргээс урьдчилан сэргийлэх ажлын төлөвлөгөө”-ний дагуу зам тээврийн ослын улмаас амь насаа алдсан хохирогчдын ар гэр, эрүүл мэндээрээ хохирсон иргэдийн дуу хоолойг олон нийтэд хүргэх ажлыг 2014 оны 10 дугаар сарын 22-ны өдөр зохион байгуулан явууллаа. Уг үйл ажиллагааг Хууль зүйн яам, Цагдаагийн ерөнхий газар, Улаанбаатар хотын Цагдаагийн газрын Замын цагдаагийн газар, Нийслэлийн онцгой байдлын газар, Яаралтай түргэн тусламжийн төв, “Улаанбаатар буян” ХХК, “Албан журмын даатгагчдын холбоо”, “Монголын залуучуудын холбоо”, “Монголын Оюутны холбоо”, “Хөгжлийн бэрхшээлтэй иргэдийн холбоо” зэрэг газрууд хамтран зохион байгууллаа.
Энэ өдөрлөгийн хүрээнд 2014 онд зам тээврийн осолд өртсөн 5 тээврийн хэрэгслийг ямар шалтгаанаар осолд орсон тайлбарын хамт 5 ачигч автомашин дээр байршуулж, араас нь цагдаа, даатгал, түргэн тусламж, онцгой байдлын шуурхай алба, буяны автомашин, цагдаа гэсэн дараалалтай цуваа хотын төвөөр тогтоосон маршрутын дагуу хөдөлгөөнд оролцож, олон нийтэд зам тээврийн ослын хор холбогдлыг ойлгуулах, урьдчилан сэргийлэх арга хэмжээг зохион байгууллаа.
Арга хэмжээний нээлтийн үйл ажиллагаа 11:30 цагт “Драгон” төвийн урд талбай дээр болж, холбогдох байгууллага, хөгжлийн бэрхшээлтэй иргэд, зам тээврийн ослоор хохирогсод олон нийтэд дуу хоолойгоо хүргэж, уг талбай дээр ноцтой зам тээврийн ослын зургийн үзэсгэлэнг гаргасан юм.

Улсын хэмжээнд 2014 оны эхний 9 сарын байдлаар бүх төрлийн  19773 хэрэг бүртгэгдсэн нь өнгөрсөн оны мөн үеийн үзүүлэлтээс 5,1 хувиар өссөн байна. Улсын хэмжээнд Тээврийн хэрэгслийн хөдөлгөөний аюулгүй байдал, ашиглалтын журмын эсрэг гэмт хэрэг 1566 бүртгэгдсэн байгаа нь нийт хэргийн  7,9  хувийг эзэлж байна. 

Улсын хэмжээнд Тээврийн хэрэгслийн хөдөлгөөний аюулгүй байдал ашиглалтын журмын эсрэг гэмт хэргийн улмаас  368 хүн нас барж, 1001 хүн гэмтсэн статистик үзүүлэлт гарч байгаа хэдий ч бодит нас баралт 498, нийслэлд 122  байна.

Тээврийн хэрэгслийн хөдөлгөөний аюулгүй байдал ашиглалтын журмын эсрэг  гэмт хэргийн улмаас нийслэлд 105 хүн нас барж, 500 хүн гэмтсэн статистик үзүүлэлтийг урьд оны үзүүлэлттэй харьцуулахад нас баралт 26,5 хувиар, гэмтсэн хүн 8,0  хувиар  өсчээ. Гэмт хэргийн улмаас нас барсан хүний  28,5 хувь нь нийслэлд  71,5 хувь нь орон нутагт амь насаа алдсан байна. 

Бүртгэгдэх үедээ сэжигтэн тогтоогдоогүй Тээврийн хэрэгслийн хөдөлгөөний аюулгүй байдал, ашиглалтын журмын эсрэг 146 гэмт  хэрэг бүртгэгдсэн. Эзэнгүй хэргийн илрүүлэлт 84,9 хувь ба өнгөрсөн оны үзүүлэлтээс 5,3 хувиар өссөн  үзүүлэлттэй байна. 2014 оны эхний 9 сарын байдлаар нийслэлд 22 эзэн холбогдогч нь тогтоогдоогүй хэрэг байна.