Монгол Улсын Ерөнхийлөгчийн зарлигаар жил бүрийн 5, 9 дүгээр сарын Бямба, Ням гарагуудыг “Үндэсний мод тарих өдөр” болгон зарласан. Энэ хүрээнд өнөөдөр /2026.05.16/ Баянзүрх дүүргийн 19 дүгээр хорооны нутаг дэвсгэрт байрлах Цагаан давааны хогийн цэгт мод тарих, ойжуулах ажил зохион байгуулагдаж, Монгол Улсын Ерөнхийлөгч У.Хүрэлсүх уг үйл ажиллагаанд оролцон, анхны модыг тарилаа.

Тус арга хэмжээнд Монголын бурхан шашинтны төв Гандантэгчэнлин хийдийн Тэргүүн хамба лам Д.Жавзандорж оролцож, “Бид бүхий л амьдралынхаа туршид байгалийн шимийг алхам тутамдаа хүртэж амьдардаг. Өөрийнхөө болон бусдын төлөө мод тарина гэдэг нь байгальд өргөх тахил учир их буян үйлдэж байгаа хэрэг” хэмээн онцоллоо.

Тус хогийн цэгийн 17 га талбайд нийт 325,000 навчит мод суулгах ажилд төрийн цэргийн болон хууль сахиулах байгууллагуудын алба хаагчид, мод үржүүлгийн мэргэжлийн төрийн бус байгууллагуудын ажилтан, ахмадын хороодын төлөөлөл зэрэг нийт 1117 хүн оролцлоо.

Цагдаа, дотоодын цэргийн байгууллагын алба хаагчид болон ахмад ажилтнууд уг үйл ажиллагаанд нэгдэж, 176 м.кв талбайд 1596 навчит мод тарьсан юм.

“Тэрбум мод” үндэсний хөдөлгөөний зорилтыг хэрэгжүүлэх, хогийн цэгийн орчныг нөхөн сэргээх, ногоон байгууламжийг нэмэгдүүлэх, иргэд, олон нийтийн экологийн боловсрол, хандлагыг дээшлүүлэхэд чухал ач холбогдолтой арга хэмжээ боллоо.