Үндэсний аюулгүй байдлын зөвлөлийн Ажлын алба, Монгол цэргийн нэгдсэн холбоо хамтран “Монгол Улсын Үндэсний аюулгүй байдал, шинэ орчин, шинэ эрсдэл, шинэ хандлага” сэдэвт эрдэм шинжилгээний хурлыг өнөөдөр /2026.05.07/ Гадаад харилцааны яаманд зохион байгууллаа.

Эрдэм шинжилгээний хурлыг Монгол цэргийн нэгдсэн холбооны Ерөнхий нарийн бичгийн дарга, доктор, профессор, дэслэгч генерал Ц.Тогоо нээж, хэлэлцэх асуудлын ач холбогдлыг онцлон тэмдэглэхийн зэрэгцээ хурлаас гарах санал, зөвлөмжүүд бодит үр дүнтэй байна гэдэгт итгэлтэй байгаагаа илэрхийлсэн юм.

Тус хурлаар олон улсын болон бүс нутгийн аюулгүй байдлын орчны өөрчлөлт, Монгол Улсын Үндэсний аюулгүй байдалд үзүүлж буй нөлөө, шинэ эрсдэл, сорилтыг эрдэм шинжилгээний түвшинд хэлэлцэж, бодлогын шинэ хандлага, шийдлийн талаар санал, зөвлөмж боловсруулах зорилго тавив.

Хуралд төрийн цэргийн болон хууль сахиулах байгууллагуудын удирдлага, эрдэмтэн судлаачид, их, дээд сургуулийн төлөөлөл оролцож, геополитик, эдийн засаг, эрчим хүч, хил хамгаалалт, хиймэл оюун ухаан, хувийн мэдээллийн аюулгүй байдал зэрэг сэдвээр илтгэл хэлэлцүүллээ.

Мөн хурлын төгсгөлд үндэсний аюулгүй байдлыг хангах бодлогын шинэ хандлага, арга зам, шийдлийн талаар санал, зөвлөмж гаргахаар болов.