НҮБ-ын Хөгжлийн хөтөлбөрийн санхүүгийн дэмжлэгтэйгээр Монгол Улсын Хүний эрхийн Үндэсний Комисс, Хууль зүй, дотоод хэргийн яам, Цагдаагийн ерөнхий газар хамтран хэрэгжүүлж буй “Монгол Улсын хууль сахиулах ажиллагаанд хүний эрх, жендэрийн эрх тэгш байдал, авлигын эсрэг үйл ажиллагааг дэмжих нь” төслийн хүрээнд “Хууль сахиулах ажиллагаа ба хүний эрх, жендэрийн эрх тэгш байдал” сэдэвт сургалтыг 2026 оны 05 дугаар сарын 05-06-ны өдрүүдэд зохион байгууллаа.

Энэхүү төсөл нь хууль сахиулах байгууллагын бодлого, дүрэм, журмыг олон улсын хүний эрхийн стандартад нийцүүлэн хянаж, шинэчлэх, хууль сахиулах алба хаагчдыг бэлтгэдэг үндсэн институт болох Дотоод Хэргийн Их сургуульд суралцаж буй залууст хүний эрхэд суурилсан хандлагыг бэхжүүлэх зорилготой.

Сургалтаар хүний эрхэд суурилсан хууль сахиулах ажиллагаа, хүний эрхийн хязгаарлалт, шалган шийдвэрлэх ажиллагаан дахь хүний эрхийн баталгаа, жагсаал цуглаан хийх эрх чөлөө, жендэрийн эрх тэгш байдал, алба хаагчийн ёс зүй, шударга зарчим зэрэг сэдвээр мэдлэг, мэдээлэл олгож, оролцоонд суурилсан дадлага, кейс тохиолдолд тулгуурласан хэлбэрээр зохион байгууллаа.