Тус газар үйл ажиллагааны тайлангийн хурал, шагнал гардуулах ёслолоо өнөөдөр /2025.12.26/ Нийслэлийн онцгой байдлын газрын хурлын танхимд зохион байгууллаа.

Тайлангийн хуралд Цагдаагийн ерөнхий газрын Тэргүүн дэд дарга, цагдаагийн хурандаа Б.Ганчулуун, Нийслэлийн цагдаагийн удирдах газрын дарга, цагдаагийн хурандаа Г.Арсланхуяг, Нийслэлийн иргэдийн Төлөөлөгчдийн хурлын дэргэдэх Иргэний зөвлөлийн дарга Т.Мөнхнасан болон дүүргийн цагдаагийн газар, хэлтсийн дарга, алба хаагчид оролцлоо.

Хурлын үеэр тус цагдаагийн удирдах газраас цагдаагийн байгууллагын үйл ажиллагаанд ашиглагдаж байгаа дата баазыг төвлөрүүлэн “Удирдлагын нэгдсэн хяналтын систем”-ийг бүтээж, алба хаагчдын ачааллыг тэнцвэржүүлэх, цагдаагийн байгууллагын ажил үйлчилгээг түргэн шуурхай хүргэж, иргэдийн сэтгэл ханамжийг нэмэгдүүлэх чиглэлээр авч хэрэгжүүлсэн онцлог ажлуудын талаарх мэдээллийг танилцуулсан.

Мөн 2025 онд эрхэлсэн ажилдаа идэвх зүтгэл, үр бүтээл гарган хамт олноо тэргүүлэн ажилласан алба хаагч, хэлтэс, газруудаа тодруулан шагнаж урамшууллаа.

Шилдэг цагдаагийн газраар “Сонгинохайрхан дүүргийн цагдаагийн газар”, Тэргүүний хамт олон”-оор “Баянзүрх дүүргийн цагдаагийн газар”, шилдэг цагдаагийн хэлтсээр “Налайх дүүргийн цагдаагийн хэлтэс” тодорч хөдөлмөрийн тэргүүний болон ажил мэргэжлийн аварга алба хаагчдыг тус тус шагналаа.