Зам тээврийн хэрэг, осол, зөрчлөөс урьдчилан сэргийлэх, замын хөдөлгөөнд оролцогчийн хэвийн, аюулгүй зорчих нөхцөлийг хангах, хөдөлгөөний ачаалал, түгжрэл саатлыг бууруулах зорилгоор 2025 оны 04 дүгээр сард Цагдаагийн ерөнхий газрын Тээврийн цагдаагийн албаны бүтцэд Нийслэлийн замын хөдөлгөөний хяналтын газрыг байгуулсан.

Нийслэл хотын хэмжээнд чиглэлийн тээврийн хэрэгслийн эгнээг чөлөөлөх, мотоцикл, мопед, сурроны хөдөлгөөн, шалган нэвтрүүлэх товчоодод 24 цагаар хяналт тавьж ажиллах, түр ба удаан зогсох дүрмийн хэрэгжилтийг хангуулах, замын хөдөлгөөний түгжрэл, ачааллыг бууруулах, хөдөлгөөн зохицуулах чиг үүргийг хэрэгжүүлэхэд дэмжлэг үзүүлэх зорилгоор Нийслэлийн Иргэдийн Төлөөлөгчдийн Хурлаас тус газрын үйл ажиллагаанд шаардлагатай сүүлийн үеийн технологиор тоноглосон замын хөдөлгөөнийг бүрэн хянах боломжтой тээврийн хэрэгсэл, цахилгаан дугуй /суррон/, техник, тоног төхөөрөмж, энгэрийн камер, тусгай хэрэгслийг өнөөдөр /2025.12.17/ өдөр гардуулан өглөө.

Уг арга хэмжээнд мөн Нийслэлийн засаг дарга бөгөөд Улаанбаатар хотын захирагч Х.Нямбаатар, НИТХ-ын дарга А.Баяр, Нийслэлийн Гэмт хэргээс урьдчилан сэргийлэх ажлыг зохицуулах салбар зөвлөлийн дарга М.Мөнгөншагай, Цагдаагийн ерөнхий газрын Дэд дарга, бригадын генерал О.Ганбат, Тээврийн цагдаагийн албаны дарга, цагдаагийн хурандаа М.Батсайхан болон бусад албаны зочид, төлөөлөгчид оролцсон юм.